Eldegi Tótenshe jaǵdai rejimi kezinde meditsinalyq aviatsiia rezerv úshin Nur-Sultannan Almatydaǵy qan ortalyǵyna 360 doza qan jetkizgen. QR Densaýlyq saqtaý ministrligi qoǵammen bailanys departamentiniń direktory Ásel Artakshinova Ortalyq kommýnikatsiialar qyzmetinde ótken brifingide osyndai málimet keltirdi, dep habarlaidy QazAqparat.
«Densaýlyq saqtaý ministrliginiń qurylǵan jedel shtaby óńirlermen birge barlyq zardap shekkenderge úzdiksiz meditsinalyq kómek kórsetýdi qamtamasyz etti. Konsýltativtik jáne praktikalyq kómek kórsetý úshin barlyq respýblikalyq jetekshi klinikalar qosyldy.
Ishki ister ministrligimen birlesip Almaty, Nur-Sultan, Shymkent, Aqtóbe qalalarynda «SQ Farmatsiia» dárilik qoimalaryn táýlik boiy kúzetý qamtamasyz etildi. Onda tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý sheńberinde patsientterdi emdeýge arnalǵan barlyq dári-dármekter, sonyń ishinde esirtki jáne psihotroptyq zattar saqtalady», - dedi ministrlik ókili.
Onyń sózine qaraǵanda, meditsinalyq aviatsiia qyzmeti de bul kezeńde jumysyn qaltqysyz oryndaǵan.
«Meditsinalyq aviatsiia rezervti qurý úshin Nur-Sultan qalasynan Almaty qalasyna qan ortalyǵyna 360 doza qan jetkizdi. Meditsinalyq uiymdar dárilik preparattarmen jáne qan komponentterimen tolyq kólemde qamtyldy», - dedi Ásel Artakshinova.
