QR Tótenshe jaǵdailar ministri Iýrii Ilin Almaty taýlarynda qaza tapqan er adamdy qutqarýǵa nelikten aviatsiia kómekke kelmegenin túsindirdi, dep habarlaidy "Ult aqparat".
«BAQ-taǵy málimetter, ásirese, blogerlerdiń ony kórgendigi, eshkim qutqarmaǵandyǵy týraly teris aqparattar jazyp jatyr. Respýblikalyq qutqarý otriady men Almaty qalasy ákimdiginiń qutqarý qyzmeti jedel toby izdeý jumystaryn kúni-túni toqtatqan emes. Geolokatsiia boiynsha sońǵy tabylǵan adam keiinnen uialy telefon geolokatsiiasynan 1 shaqyrym jerde anyqtaldy. Dybys berdi, aiqailady, ol da estidi, qutqarýshylarymyz da estidi degen naqtylanǵan esh aqparat joq», - dedi Iýrii Ilin Ortalyq kommýnikatsiialar qyzmetindegi baspasóz máslihatynda.
Onyń aitýynsha, er adam óte aýyr jaǵdaida, aiaǵyn úsik shalǵan kúide tabylǵan.
«Atalǵan azamatty tez arada meditsinalyq mekemege jetkizýdi bastadyq, tún bolyp ketti. Nelikten aviatehnika qoldanylmady? Izdeý jumystary júrgizilgen eki kún boiy tikushaqty áýege kóterýge tyrystyq. Qazgidromet bizge meteoahýal týraly málimet beredi. Biz Qazaqstannyń búkil aýmaǵyna ortaq aviatsiialyq qaýipsizdik erejelerine baǵynamyz. Qazavianavigatsiia qutqarý jumystary úshin Qazaviaqutqarý bólimsheleriniń ushýyna ruqsat bergen joq. Degenmen, izdeý júrgizilgen aýdanda aspan birshama ashyq boldy. Alaida, tikushaq ushýy Azamattyq aviatsiia komitetiniń Almaty qalasyndaǵy bólimshesi ruqsatymen júzege asyrylady», - dep túsindirdi ministr.
