Áleýmettik jelilerde Almaty – Qorǵas tasjolynda («betonka») jol jamylǵysyndaǵy aqaý saldarynan birneshe kóliktiń zaqymdanǵany túsirilgen video tarady, dep habarlaidy ult.kz.
Beinejazbadaǵy málimetke sáikes, Báidibek bi aýylyna burylysqa jetpeitin jol ýchaskesinde beton jabyndysynyń bir bóligi kóterilip, jol betine shyǵyp qalǵan. Bul qaýip tóndirip tur. Sonyń saldarynan joǵary jyldamdyqpen kele jatqan júrgizýshiler kólikterin zaqymdap jatyr.
Kadrlarda jol jieginde májbúrli túrde toqtap turǵan birneshe kólik kórsetilgen. Jetour krossoveriniń dóńgelegi jarylyp, diskisi búlingen. Mercedes-Benz G-Class («Gelendvagen») jol talǵamaityn kóliginiń janarmai bagy tesilgen. Al Hyundai sedanynyń berilis qorabyna beton kesegi tiip, nátijesinde maiy jerge tógilgen.
Aldyn ala málimet boiynsha, atalǵan jol bóligindegi aqaýdan shamamen bes kólik zardap shekken.
Kólik ieleriniń aitýynsha, olar «QazAvtoJol» qyzmetkerleri men politsiiany 102 nómiri arqyly shaqyrýǵa árekettengenimen, nátije bolmaǵan. Sondai-aq joldan ótip bara jatqan eki patrýldik politsiia ekipajy ýaqyttyń tyǵyzdyǵyn alǵa tartyp, toqtap kómektesýden bas tartqan.
Osy baǵytta jolǵa shyǵatyn júrgizýshilerge asa saq bolyp, jyldamdyq rejimin qatań saqtaýǵa keńes beriledi.
