Politsiia departamentiniń ǵimaratyna jasalǵan shabýyl - joǵary deńgeide uiymdastyrylǵan jáne arnaiy daiyndyqtan ótken kásibi sodyrlardyń áreketi. Bul týraly departament basshysy Qanat Taimerdenov aitty, dep habarlaidy QazAqparat.
«Biz úshin lańkesterdiń ǵimaratqa kirýine jol bermeý mańyzdy boldy, óitkeni olar Molotov kokteilderin jappai paidalandy: eger órt bolsa, politsiia qaqpanǵa túser edi. Olar óte uiymdasqan túrde birneshe jerden: Masanshy-Qabanbai batyr, Masanshy-Qarasai batyr, «Nikol» soborynan jáne osy attas burynǵy bazardyń aýmaǵynan shabýyl jasady. Iaǵni, bizdi birden qorshap aldy. Departament perimetri boiynsha qyzmetkerlerdi ornalastyrdyq. Men osy ýaqyt boiy jumys ornynda boldym. Al naǵyz qaýip tóngen kezde, olar bizge oq jaýdyrǵanda, biz de shabýyldaýshylarǵa qarsy oq ata bastadyq», – deidi Qanat Taimerdenov.
Onyń aitýynsha, sodyrlar ǵimaratty buzyp ótý úshin buryn ózderi tartyp alǵan KamAZ-dy paidalanǵan.
«Bul shabýylǵa 1 myńǵa jýyq adam jumyldyryldy. Olar jaýyngerlik taktikany bilip qana qoimai, ony óte jaqsy meńgergen: urys quramalaryn uiymdastyrýdy, qalalyq jaǵdaidaǵy urys erejelerin jaqsy biletin, daiyndalǵan adamdar. Jaqyn mańdaǵy kópqabatty úidiń tóbesine snaiperlerdi ornalastyrǵan. Jáne olar bizge oq jaýdyrdy», — dedi Almaty politsiiasynyń basshysy.
