Almatyda politsiia qara topyraqty urlaý faktisi boiynsha sotqa deiingi tergeýdi bastady. Bul týraly qalalyq prokýratýra málim etti, dep habarlaidy "Ult aqparat".
Almaty qalasynyń mamandandyrylǵan tabiǵat qorǵaý prokýratýrasy ýákiletti organdarmen birlesip qorshaǵan ortany qorǵaý jónindegi aldyn alý jumystary barysynda jer topyraǵynyń qunarly qabatynyń baqylaýsyz ainalymy faktilerin anyqtady.
«Alataý, Bostandyq, Jetisý, Medeý, Naýryzbai jáne Túrksib aýdandarynyń aýmaǵynda belgisiz tulǵalar ruqsat qujattarynsyz qara topyraq, topyraq jáne ballast óndirý jumystaryn júrgizdi. Atalǵan faktiler boiynsha qalalyq Politsiia departamenti 2021 jylǵy 30 sáýirde Qazaqstan Respýblikasy Qylmystyq kodeksiniń 188-babynyń 2-bóligi (urlyq) boiynsha sotqa deiingi tergeýdi bastady»,-dep habarlady qalalyq prokýratýradan.
Zańsyz óndirilgen topyraq negizinen qurylys jumystary úshin shikizat retinde paidalanylady.
Qazirgi ýaqytta barlyq qatysy bar tulǵalardy anyqtaý boiynsha qajetti is-sharalar júrgizilýde.
