Almaty qalalyq politsiia departamenti belgili aqyn R.Zaiytovtyń keshe tústen keiin qalanyń Alataý aýdanynda oryn alǵan zańsyz sherýge qatysqany úshin politsiiaǵa jetkizilgendigin málim etti, dep habarlaidy "Ult aqpaarat".
«Túsindirý áńgimelesýi júrgizilgennen keiin azamat R.Zaiytov úiine jiberildi. Biraz ýaqyt ótkennen keiin politsiia departamenti ǵimaratynyń aldyna azamat R.Zaiytovpen kezdesýdi qalaǵan azamattar jinaldy. Olarǵa R.Zaiytovtyń úiinde ekendigi aityldy. Biraq jinalǵandar taramai qoidy. Jinalǵandardyń munan arǵy áreketteri jappai tártipsizdikke ulasyp ketýi múmkin ekendigin eskerip, quqyq qorǵaý organdarynyń talabymen azamat R.Zaiytov adamdar jinalǵan jerge jetkizildi jáne ol olardyń aldynda sóz sóilep, zańdy buzbaýǵa, quqyq qorǵaý organdarynyń zańdy talabyn oryndaýǵa shaqyrdy», - delingen qalalyq departament taratqan habarlamada.
Taratylǵan aqparatta atalǵan fakti prokýratýra organdarynyń baqylaýynda ekendigin atap ótken. Sonymen qatar vedomstvo málimetinshe, azamat R.Zaiytov óz úiinen birneshe video túsirip, ony óziniń ideialyq jaqtastaryna baǵyttaǵan.
«Qurmetti, baýyrlar, almatylyqtar. Alańdaityndai eshteńe bolyp jatqan joq. Sondyqtan barlyqtaryńzdan úilerińizge qaitýlaryńyzdy ótinemin. Eshkimge de renish joq. Mine, qazir úige barmaq bolyp jinalyp jatyrmyn. Baýyrlar, sizder de úilerińizge qaityńyzdar», - dedi ol óziniń videoúndeýinde.
