Uiymdasqan qylmystyq toptardyń biriniń múshelerinen áskeri arsenal tárkilendi. Is-sharany politsiia qyzmetkerleri Almaty qalasy boiynsha UQKD-niń kómegimen júrgizdi, – dep habarlaidy Polisia.kz.
“Birqatar aýyr jáne asa aýyr qylmystardy jasaǵany úshin osy uiymdasqan qylmystyq toptyń bes múshesi ustaldy jáne qamaýǵa alyndy. Keshendi jedel jáne arnaiy is-sharalardy júrgizý barysynda olardyń Almaty oblysy aýmaǵynda birneshe qarý jasyrý ornyn uiymdastyrý derekteri anyqtaldy. Nátijesinde eki “Kalashnikov” avtomaty (AKS), “Makarov” jáne “TT” júieleriniń eki jaýyngerlik tapanshasy, úsh ańshylyq karabin, eki tegis uńǵyly vinchester, 13 kesilgen ańshy myltyǵy, 53 ańshy myltyǵy, úsh travmatikalyq tapansha, sondai-aq, ártúrli atys qarýyna arnalǵan 200-den astam oq-dári tabyldy. Sonymen qatar uiymdasqan qylmystyq top múshelerinen eki jaýyngerlik jáne tórt jaryq shýly granata, tórt pyshaq, eki portativti radiostantsiia, sondai-aq, ártúrli arnaiy quraldar – optikalyq kózdeýishter, oq ótkizbeitin jide, taiaqsha jáne t.b. tárkilendi. Sońǵy qarý-jaraq jasyrylǵan oryndy keshe ǵana anyqtadyq”, – dedi Almaty qalalyq Politsiia departamenti bastyǵynyń orynbasary Berik Ábilbekov.
Qarý men oq-dárilerdi zańsyz saqtaý deregi boiynsha QR QK-niń 287-baby 3-bóliginiń normalaryna sáikes sotqa deiingi tergeý amaldary júrgizilýde. Tárkilengen arsenal saraptamaǵa jiberildi, onyń qorytyndysy boiynsha tárkilengen qarý-jaraq pen oq-dárilerdiń shyǵý tegi men iesi anyqtalatyn bolady.
