Almaty, Pavlodar jáne Túrkistan oblystarynda aýyl sharýashylyǵy taýarlaryn saqtaýǵa arnalǵan 5 kóterme-taratý ortalyǵyn salý kózdelip otyr, dep habarlaidy QazAqparat.
«Birinshi kezeńde aýyl sharýashylyǵy taýarlaryn saqtaýǵa arnalǵan 5 kóterme-taratý ortalyǵyn Almaty, Pavlodar jáne Túrkistan oblystarynda salý josparlanyp otyr. Biz biyl 600 myń tonnalyq kúzgi ónimdi osy nysandarda ornalastyrǵymyz keledi. Kelesi eki kezeńde, respýblikalyq biýdjettiń shekteýli múmkindikterin, sondai-aq kóterme-taratý ortalyqtarynyń aýqymyn eskere otyryp, memlekettik-jekeshelik áriptestik mehanizmin qoldanamyz. Jobany iske asyrýdyń jalpy quny 237,5 mlrd teńgeni quraidy», - dedi Baqyt Sultanov Úkimet otyrysynda.
Onyń aitýynsha taýar ótkizý júiesin qurý shamamen 10,5 myń, onyń ishinde qurylys kezeńine 4,2 myń, nysandardy paidalanýǵa 6,3 myń mamandy tartýǵa jáne jumys oryndarymen qamtamasyz etýge múmkindik beredi.
«Nysandardy salý úshin otandyq jobalaý jáne qurylys kompaniialary tartylady. Jalpy 2022 jylǵa qarai kólemi jylyna 4,8 mln tonna qýatty quraityn tetikti ázirlep usynamyz. Bul qýat tapshylyǵyn tolyq qamtyp, aldaǵy ýaqytta eksporttyq ekspansiiaǵa jaǵdai jasaidy. Biz ákimdiktermen alǵashqy eki kezeń úshin jer telimin bólý máselesin pysyqtadyq. Qalǵan 15 nysan boiynsha jumys qysqa merzimde júrgiziledi», - dedi ol.
