Almaty oblysynda 90 jasynda qaraýsyz qalǵan ustazyn qolyn alyp, qamqorlyq kórsetip otyrǵan otbasy eldi súisintti.
Týǵan qyzynan jylý kórmegen ájeniń taǵdyryna bei-jai qarai almaǵan shákirti oǵan erekshe iltipat kórsetip, óz úiinde baǵyp otyr, dep jazady "Vremia" gazetine silteme jasaǵan KAZ.NUR.KZ.
Almaty oblysy Panfilov aýdany Horgos aýylynyń turǵyny Telman Ýsmanov óziniń alǵashqy ustazy, búginde 90 jasqa kelgen Zoia Stepanovna Serdobintsevany qolyna alyp, qamqorlyq tanytyp otyr. Joldasy qaitys bolyp, qyzy qalaǵa ketken ájei osy jasqa kelgende jalǵyz qalǵan.
Ustazynyń úiinde qaraýsyz jatqanyn kórip qalǵan Telman onyń jaǵdaiyna kóz juma qarai almaǵandyǵyn aitady. Aitýynsha, ol aýyldy kórkeitý úshin zor úles qosqan aýyl aqsaqalynyń adam tózgisiz jaǵdaida jalǵyz ózi ómir súrýine jol bere almaǵan.
"Bir de bir mereitoi, bir de bir jiyn ol kisiniń qatysýynsyz ótpeitin. Ol aýyldaǵy mádeni is-sharalardy uiymdastyrýshysy edi. Jazda fýtbol jáne voleibol matchtaryn uiymdastyratyn. Qysta shańǵy jarystaryn qolǵa alatyn. Jas ta, kári de ony qatty syilaityn", - deidi qaiyrymdy jigit aǵasy.
"2018 jyldyń 15 qarashasy edi. Sol kún áli kóz aldymda. Zoia Stepanovnanyń úiiniń janyna ótip bara jatyrmyn. Úi mańy múlgigen tynyshtyq. Úige kirsem, tastai sýyq. Pesh jaǵylmaǵan, jatyn bólmede birneshe kórpegen oranǵan kúiinde ustazym jatyr. Meni kórip, jylap jiberdi. Bul kórinisti kórip, júregim aýyryp ketti. Qatty aiap kettim", - dep esine alady ol.
Osylaisha, ol aýyl bolyp ájeige kómek berýde qolǵa alǵan. Qart kisiniń úiine kezekshilik ornatyp, kómek bere bastaǵan. Al ustaz bolsa, shákirtteriniń balalaryna ertegi aityp, tárbie beretin.
Biraq, byltyr shilde aiynda Ýsmanovtar áýleti Zoia Stepanovnany qolyna alamyz dep sheshkenin aitady.
"Áielim Almatyǵa, men jumystarmen Jarkentke ketkem. Eki kún aýylda bolmadyq. Sol kezde ol kisi biz ony tastap ketti eken dep oilapty. Qatty ýaiymnan aiaǵy júrmei qalypty", - deidi ol.
Mine, sol ýaqyttan beri ustaz shákirtiniń úiinde turyp jatyr.
"Telman kóterip alyp, úige ákeldi. Monsha jaǵyp, jýyndyrdyq. Sodan beri birge turyp jatyrmyz", - deidi Telmannyń jary Raihan.
Maqala avtory búginde qart ájeidi Raihan aiyna eki ret tyrnaq sheberine aparyp, manikiýr jasatatynyn jazady. Sonymen birge, onyń shashyn jóndep, shashtaraz shaqyrtady eken.
"115 myń teńge kóleminde zeinetaqy alamyn. Janazama dep jinaǵan edim. Biraq, endi meni jerleitin adamdar bar. Sondyqtan qolymdaǵynyń bárin Raihanǵa beremin. Ol maǵan dári-dármek, dárýmender, jemis-jidek alyp beredi. Aiyna eki ret tyrnaq jasatamyn. Shashtaraz shaqyramyz", - deidi ájeidiń ózi.
Al óziniń týǵan qyzy Svetlana týraly ájei tis jarǵysy kelmeidi. Ýsmanovtar otbasy ájeidi aptasyna eki ret Sviato-Kazan shirkeýine aparyp turatynyn aitady. Ájeidiń aitýynsha, onda ol jaratqannan ózine osynshama jaqsylyq jasaǵan jandardyń amandyǵyn tileidi.
Aita keterlik taǵy bir jait, Ýsmanovtar otbasy buǵan deiin taǵy eki ájeige qamqorlyq tanytqan. Olardyń biri - Mahinýrdyń balalary tipten óte tanymal kisiler eken. Alaida týǵan analarynan bas tartqan balalary Raihan men Telmanǵa aiyna 80 myń teńge aqsha aýdaryp turǵan eken.
Balalarynyń qylyǵyna kúiingen ájei óler aldynda: "Meni Telman jerlesin", - degen amanat aityp ketken kórinedi.
