Koronavirýs infektsiiasynyń birneshe deregi tirkelýine bailanysty indettiń taralýyna jol bermeý maqsatynda Almaty oblysyndaǵy Kerbulaq aýdanynyń Saryózek kenti karantinge jabylady. Osyǵan sai aýdannyń bas memlekettik sanitarlyq dárigeri E.Eshkenovtyń qaýlysy qabyldandy, dep habarlaidy "Ult aqparat" Almaty oblysy ákiminiń baspasóz qyzmetine silteme jasap.
Atalǵan qaýlyda karantin kezindegi shekteýler, sanitarlyq-dezinfektsiialyq sharalar týraly egjei-tegjeili atap kórsetilgen. Qaýly talaptaryna sáikes Saryózek turǵyndarynyń úiden shyǵýyna tyiym salynady. Bir otbasydan tek bir adamǵa ǵana kúnine bir ret azyq-túlikke, dárihanaǵa, birinshi kezektegi qajettilikter alýǵa shyǵýyna ruqsat etiledi. Karantin rejimin buzǵan azamattar Qazaqstan Respýblikasynyń zańnamalaryna sáikes ákimshilik jaýapqa tartylady.
Atap ótsek, Saryózektegi karantin 17 sáýirden 18-ine qaraǵan túngi saǵat 00.00-den 1 mamyrǵa deiin sozylady dep belgilengen.
Esterińizge sala keteiik, búgin Almaty oblysynda koronavirýspen aýyrǵandar sany taǵy 8 adamǵa artty.
Onyń ishinde Kerbulaq aýdanynda COVID-19 infektsiiasyn juqtyrǵan adamdardyń sany — beseý. Olardyń eń úlkeni 35 jasta, eń kishisi 3 jastaǵy bala. Syrqattarmen bailanysta bolǵan 38 adam karantinge alyndy.
Jalpy Almaty oblysynda koronavirýspen aýyrǵandar sany 37-ge jetti.
