Almaty oblystyq politsiia departamentiniń esirtkige qarsy is-qimyl basqarmasynyń qyzmetkerleri jyl basynan beri birqatar jedel-izdestirý jumystaryn júrgizip, birneshe qylmystyq toptardyń jolyn kesti. Bul týraly Almaty oblysy PD baspasóz qyzmeti habarlady.
«2021 jyldyń alty aiynyń qorytyndysy boiynsha, Almaty oblysynyń aýmaǵynda esirtki zattarynyń zańsyz ainalymyna bailanysty qylmystyq quqyq buzýshylyqtardyń anyqtalý kórsetkishi 30,1%-ǵa tómendedi. 170 esirtki qylmysy, 98 esirtki satý faktisi anyqtaldy. Zańsyz ainalymnan barlyǵy 109 kg 412 gr túrli esirtki zattary alyndy, onyń ishinde marihýana – 84 kg 523 gr, gashish 16 kg 837 gr jáne geroin 31 gr. Sondai-aq 8 kg 12 gramm sintetikalyq esirtki zaty tárkilendi», – deidi Almaty oblysy politsiia departamentiniń esirtkige qarsy is-qimyl basqarmasynyń bastyǵy Qazbek Muhamedov.
Jumys josparyna sáikes, Almaty oblysynyń aýmaǵynda 2021 jyly esirtkiniń sintetikalyq túrleriniń zańsyz ainalymyna bailanysty 27 qylmystyq quqyq buzýshylyq tirkeldi.
«Nashaqorlyqtyń aldyn alý maqatynda esirtkige qarsy is-qimyl basqarmasynyń qyzmetkerleri basqa da ýákiletti organdarmen birlesip túrli is-sharalar ótkizýde. Atap aitsaq, seminarlar, ashyq esik kúnderi, jumys kezdesýleri jáne sporttyq jarystar. Negizinde mundai baǵdarlamalar stýdenttermen jáne oqýshylarmen ótkiziledi. Osylaisha biz nashaqorlyqsyz salaýatty qoǵam qalyptastyrǵymyz keledi», – dep atap ótti politsiia polkovnigi Qazbek Muhamedov.
