2020 jylǵa qarai Almaty oblysynyń kólik infraqurylymy tolyqtai sheshimin tabady. Osy maqsatqa 400 mlrd teńgeden astam qarjy jumsaý josparlanýda. Bul jóninde Almaty oblysyndaǵy issapar barysynda birinshi vitse-premer Asqar Mamin málim etti, dep habarlaidy QazAqparat tilshisi.
Búginde Almaty-Taldyqorǵan tas jolynyń qurylysy aiaqtalýǵa jaqyn.
«Megapolis pen oblys ortalyǵynyń ara qashyqtyǵy jaqyndai tústi. Buǵan deiin jolaýshylar 5 saǵattan artyq jol júrse, qazir joldyń araqashyqtyǵy 2-2,5 saǵatqa deiin qysqardy», - dep atqarylyp jatqan jumystardyń jai-japsarymen Amandyq Batalov tanystyrdy.
Óz kezeginde Asqar Mamin «Almaty-Taldyqorǵan» tas jolynyń aiaqtalyp, halyqtyń igiligine berilýi Táýelsizdiktiń 25 jyldyǵyna tamasha tartý ekenin atap ótti. Qazirgi tańda «Nurly jol» baǵdarlamasy aiasynda Almaty-Óskemen tas jolynyń 112 shaqyrymyna qurylys jumystary júrgizilýde. 3 merdiger kompaniia, 750-ge jýyq tehnika men 1300-ge tarta adam eńbek etýde.
Atalǵan jobalardyń júzege asýyna 20,2 mlrd. teńgeden astam qarjy bólindi. Sapar barysynda Premer-Ministrdiń birinshi orynbasary Taldyqorǵan qalasyndaǵy 7-yqsham aýdanda da boldy. Jańadan boi kótergen aimaqta birneshe nysandar salynýda. Aldaǵy ýaqytta 1200 oqýshyǵa arnalǵan mekteptiń qurylysy bastalady. Jalpy, jańa yqsham aýdandarda 21 myńnan asa halyq turady dep kútilýde. Al qazir taldyqorǵandyqtardyń sany 168 myńǵa jýyqtap qaldy.
