Almaty oblysynyń ákimi Amandyq Batalov óz orynbasary Baǵdat Manzorov isine pikir bildirdi, dep habarlaidy "Ult aqparat".
«Oqiǵa bolǵanda ol (Baǵdat Manzorov – red.) maǵan kelip, Almatydaǵy burynǵy jumysy boiynsha ekenin túsindirdi. Jaǵdaiyn aityp, tólemsiz eńbek demalysyn surady. Men jiberdim. Ne bolyp, ne qoiǵanyn tergeý organdary anyqtai jatar. Biraq men ony jeke adam retinde baiaǵydan bilemin. Ol Kóksý aýdanynyń ákimi bolyp jumys istedi. Keiin maǵan keldi. Eki ai ǵana jumys istedi. Bul aralyqta oǵan birneshe tapsyrma berdim. Barlyǵyn oryndady. Men oǵan «Aryz jaz, jumystan shyq nemese máseleńdi tez arada shesh» dep aita almaimyn ǵoi. Adami turǵyda qaraý kerek. Kez kelgen adam mundai jaǵdaiǵa tap bolýy múmkin», - dep jaýap berdi A. Batalov Ortalyq kommýnikatsiialar qyzmetinde ótken baspasóz máslihatynda jýrnalister suraǵyna.
Onyń aitýynsha, ákim orynbasarynyń isimen tergeý organdary ainalysady.
«Eger kináli bolsa, jaýap beredi, kinási bolmasa – jumysyn ári qarai jalǵastyrady», - dedi Amandyq Batalov.
Eske salsaq, Almaty oblysy ákiminiń orynbasary Baǵdat Manzorov ustalǵany týraly buǵan deiin habarlaǵan bolatynbyz. QR Sybailas jemqorlyqqa qarsy is-qimyl agenttigi oǵan QR Qylmystyq kodeksiniń 190-baby, 2-bóligi, 2-tarmaǵy («Laýazymyn paidalaný arqyly asa iri kólemdegi alaiaqtyq») boiynsha aiyp taqty.
Keiin Bas prokýratýra Baǵdat Manzorovqa qatysty qylmystyq is toqtatylǵanyn resmi túrde málimdedi. Kóp uzamai sheneýnik óz qyzmetine qaita kiristi.
Óz kezeginde agenttik Bas prokýratýranyń bul sheshimine narazylyq tanytty.
