Qańtar aiynda bolǵan búlik kezinde órtengen Almaty oblysy ákimdiginiń qujattary qalanyń shetinde shashylyp jatyr. Bir turǵyn Almaty oblysynyń ákimdigi dep jazylǵan qujattardy video túsirip, jelige júktegen, dep habarlaidy QazAqparat.
Taldyqorǵan mańynda shashylyp jatqan býma-býma qaǵazǵa qatysty Almaty oblysy ákimdiginiń baspasóz qyzmeti munyń barlyǵy eshqandai mańyzy joq qaǵazdar dep túsindirdi.
Ákimdik ǵimaraty órtengennen keiin, qazir tazalaý jumystary júrgizilip jatyr.
Al sol jumystardy júrgizgen jaýaptylar bir kólik qaǵazǵa toly qoqysty Taldyqorǵanǵa qarasty Eńbek aýylynyń mańyna tógip ketken.
Qazir olarǵa eskertý jasalyp, barlyq qaǵazdar órtelip, belgilenbegen jerdegi qoqystyń kózi joiyldy.
«Almaty oblysy ákimdiginiń ǵimaratyn tazalaý barysynda merdiger mekeme shaǵylǵan qirandylar men órtten qalǵan qoqystardy, sonyń ishinde mańyzy joq qaǵazdardy qalalyq qoqys poligonyna shyǵardy. Áleýmettik jelilerde jariialanǵan aqparattar men «Almaty oblysynyń 2016-2020 jyldarǵa arnalǵan jumyldyrý jospary» degen jazýy bar papkaǵa qatysty aitar bolsaq, bul papka syrtqy qap bolyp esepteledi, ishinde eshqandai mańyzdy málimet joq. Qazirgi kezde qaǵaz qoqystar órteldi, belgilenbegen jerdegi qoqys joiyldy» delingen Almaty oblysy ákiminiń baspasóz qyzmetiniń jaýabynda.
