Almaty oblysynyń Qarasai aýdanyna qarasty Raiymbek aýylyndaǵy gazbetondy blok shyǵaratyn tsehta bolǵan jarylys boiynsha qylmystyq is qozǵaldy, dep habarlaidy QazAqparat.
«Osy fakti boiynsha QR QK 156 baby «Eńbekti qorǵaý qaǵidalaryn buzý» 3-bóligi boiynsha is qozǵalyp, tergeý júrip jatyr. Atalǵan fakti Almaty oblysyndaǵy Politsiia departamenti basshylyǵynyń qatań baqylaýynda», - dedi Almaty oblystyq Politsiia departamentindegi baspasóz qyzmetiniń jetekshisi Sergei Neznaev.
Atalǵan qylmystyq kodekstiń osy babyna sáikes, kináli adam belgili bir laýazymdy atqarý quqyǵynan 3 jylǵa deiin aiyrylyp, bes jylǵa deiin bas bostandyǵynan shekteledi. Nemese dál osy merzimge bas bostandyǵynan aiyrylady.
Eske salsaq, 31 tamyz kúni Qarasai aýdanynyń Raiymbek aýylynda gazbetondy blok shyǵaratyn tsehta jarylys boldy. Saldarynan tseh ishinara buzylyp, tútin shyǵatyn qubyrdyń bir bóligi jeke turǵyn úi sektorynyń aýmaǵyna ushyp túsken. Jarylys ornynda 1961 jylǵy er adamnyń denesi tabyldy. Aýdandyq aýrýhanaǵa ártúrli jaraqatpen eki adam jetkizilgen edi. Aýrýhanaǵa jetkizilgen 1981 jylǵy naýqas jansaqtaý bóliminde 31 tamyz kúni keshki saǵat 20:20 da qaitys boldy. Almaty oblystyq densaýlyq saqtaý basqarmasynyń baspasóz qyzmetiniń hatshysy Láilim Áýbákirovanyń sózinshe, aýrýhanada jatqan 1984 jylǵy azamattyń da jaǵdaiy aýyr. Ol travmatologiia bóliminen jansaqtaý bólimine aýystyrylǵan.
