Almaty oblysynda Buqaralyq aqparat quraldary qyzmetkerleri kúnine orai óńir jýrnalisterine páter kilti tabystalyp, aqparat salasynyń úzdikteri memlekettik nagradalarmen marapattaldy. Saltanatty rásimde marapattardy oblys ákimi Marat Sultanǵaziev tabystap, BAQ ókilderin kásibi merekemen quttyqtady, dep habarlaidy ult.kz.
Memleket basshysynyń atynan «Alataý araiy» gazetiniń bas redaktory Qýanysh Tuńǵatar men «Ólke tynysy» JShS-nyń baspa qyzmetindegi úilestirýshisi Janat Toqanovaǵa jańa páterdiń kilti berildi.
Sondai-aq ardager jýrnalist, «Ólke tynysy» JShS basshysynyń keńesshisi Kádirbek Qunypiiauly «Parasat» ordenimen, «Eńbekshiqazaq» gazetiniń tilshisi Igor Týranin «Eren eńbegi úshin» medalimen, al «Alataý araiy» gazetiniń jaýapty hatshysy Sholpan Nurjaýova «Shapaǵat» medalimen marapattaldy. Budan bólek, birqatar media maman «Eńbek ardageri», «Aqparat salasynyń úzdigi» tósbelgilerine, Qurmet gramotalary men Alǵys hattarǵa ie boldy.
Oblys ákimi jýrnalisterdiń qoǵamdaǵy róline toqtalyp, olardyń el men halyq arasyndaǵy bailanysty nyǵaitýdaǵy eńbegin joǵary baǵalady.
Sonymen qatar Marat Sultanǵaziev jýrnalister úshin taǵy bir jaǵymdy jańalyqty jariialady. Onyń aitýynsha, biyldan bastap «Alataý» óńirlik ipotekalyq baǵdarlamasyna «Buqaralyq aqparat quraldary» sanaty engizildi. Endi Almaty oblysynda eńbek etetin jýrnalister atalǵan baǵdarlama arqyly baspana alýǵa múmkindik alady.
Sondai-aq óńirde jyl saiyn uiymdastyrylatyn «Samǵaý» media syilyǵy biyl da jalǵasady. Baiqaýda «Taza Qazaqstan» jáne «Zań men tártip» taqyryptaryndaǵy úzdik materialdarmen qatar, oblystyń áleýmettik-ekonomikalyq damýyn jan-jaqty nasihattaǵan jýrnalister de marapattalady.
Jańa baspanaǵa ie bolǵan Qýanysh Tuńǵatar bul qoldaýdy jýrnalister eńbegine kórsetilgen úlken qurmet dep baǵalap, Memleket basshysy men oblys ákimdigine alǵysyn bildirdi.
