Qazaqstan Respýblikasy Táýelsizdiginiń 25 jyldyǵy aiasynda Almaty oblysynyń shalǵaida ornalasqan 25 eldi mekenindegi turǵyndardy profilaktikalyq tekserýden ótkizý maqsatynda «25 Juldyzdy kún» aktsiiasynyń sheńberinde «Skrining» sharasy bastaldy.
Aktsiia sheńberinde Taldyqorǵan qalasyndaǵy Jýrnalister úiiniń aldyna «Táýelsizdikke 25 jyl», «25 juldyzdy shara» degen jazýy bar ádemi plakattermen bezendirilgen 5 jyljymaly meditsinalyq keshen arnaiy ákelindi. Alǵash bolyp sóz alǵan oblystyq densaýlyq saqtaý basqarmasynyń basshysy Ashan Baidývaliev «Densaýlyq» memlekettik baǵdarlamasy sheńberinde atqarylyp jatqan jumystarǵa qysqasha toqtalyp, mundai aldyn alý sharalarynyń densaýlyq saqtaýda tigizer paidasy zor ekenin atap ótti.
- Kásibi mamandanǵan qyzmetkerler jergilikti jerlerge shyǵyp zamanaýi meditsinalyq quraldardy qoldana otyryp, joǵary kásibi dárigerlik kómek kórsetedi, sonymen qatar skrining jáne basqa da arnaiy tekserýler qoljetimdi túrde júrgiziletin bolady, - dedi A. Baidývaliev.
Súiinbai atyndaǵy oblystyq filarmoniia ánshileriniń Otan, el, týǵan jer taqyrybyndaǵy ánderi shyrqalyp, jinalǵandar jyljymaly keshenderdi shalǵai eldi mekenderge saltanatpen shyǵaryp saldy. Bul jyljymaly meditsinalyq keshender Kóksý, Aqsý, Eńbekshiqazaq, Panfilov aýdandary men Qapshaǵai qalasynyń 25 aýylynyń turǵyndaryna meditsinalyq, konsýltativtik kómek kórsetý úshin jolǵa shyqty. Osy aktsiia aiasynda aýyl turǵyndary meditsinalyq tekserýlerden ótip, arnaiy mamandardyń keńesin ala alady.
Sharanyń maqsaty – profilaktikalyq tekserý arqyly syrqatty erte anyqtaý, shalǵaidaǵy eldi meken turǵyndary úshin meditsinalyq qol jetimdilikti arttyryp, sala mamandarynyń keńesin jáne eldi mekende ornalasqan meditsinalyq uiymdarda joq diagnostikalyq, quraldyq tekserýlerdi uiymdastyrý.
Jalpy, búginde Almaty oblysynyń 1 981 700 turǵynyna 826 meditsinalyq mekeme qyzmet kórsetedi. Olarda 4 732 dáriger men 13 564 orta meditsina qyzmetkerleri jumys isteidi. Densaýlyq saqtaý salasynyń 2016 jylǵy biýdjeti 81,2 mlrd. teńgeni quraidy. Biylǵy jyldyń 9 aiy ishinde oblystyq aýrýhanalarda 198 756 naýqas emdelip shyqty. Skriningtik tekserýdiń arqasynda onkologiialyq aýrýlardy erte bastan anyqtaý 54,1% jetti.
