Panfilov aýdanynda bes jasóspirim mingen Nissan Cefiro aýdaryldy. Jol apatynan kámeletke tolmaǵan úsh bala kóz jumdy, taǵy ekeýi aýrýhanaǵa jetkizildi, dep habarlaidy Sputnik Qazaqstan.
Kýágerler byt-shyty shyqqan avtokóliktiń videosyn áleýmettik jelide jariialady. Rolik avtory jol apaty Kóktal-Áýlieaǵash tas jolynda 3 qańtarǵa qaraǵan túni bolǵanyn aitady. Oqiǵa saldarynan birneshe bala mert bolǵan.
Almaty oblysynyń politsiia departamenti bul aqparatty rastady. Anyqtalǵandai, Nissan Cefiro kóligin Kóktal aýylynyń 15 jastaǵy jasóspirimi aidaǵan. Bala rólge ie bola almai, kólik aýyl arasyndaǵy jolda aýdarylǵan.
"Oqiǵa ornynda júrgizýshiniń ózi jáne 14-15 jastaǵy eki jolaýshy bala ajal qushty. Taǵy eki jasóspirim túrli jaraqatpen ortalyq aýdandyq aýrýhanaǵa jatqyzyldy. Qylmystyq kodekstiń 345-baby 4-tarmaǵy boiynsha qylmystyq is qozǵaldy. Qazir oqiǵanyń mán-jaiyn jan-jaqty zerdeleýge baǵyttalǵan tergeý amaldary júrgizilip jatyr", - dep málimdedi vedomstvonyń baspasóz qyzmeti.
Tergeý aiasynda birqatar tiisti saraptama taǵaiyndaldy. Sondai-aq politseiler avtokólik iesin jaýapqa tartýdy kózdep otyr. Oǵan qatysty QK 349-baby 4-tarmaǵy (Kólik júrgizýge quqyǵy joq júrgizýshiniń kólikti basqarýyna jol berý) boiynsha qylmystyq tergeý qozǵaldy.
