foto: stylishbag.ru
Almaty oblysy Raiymbek aýdany Narynqol aýylynda 10 synyp oqýshysy 6 jasóspirimdi kólikpen qaǵyp ketti, dep habarlaidy "Ult aqparat".
Áleýmettik jelide taraǵan videodan «Subaru» kóliginiń jeke úidiń qorshaýy men trotýardyń arasynda turyp qalǵanyn, sondai-aq patrýldik politsiia qyzmetkerlerin kórýge bolady.
"21 qyrkúiek saǵat shamamen 18:41-de Raiymbek aýdany Politsiia basqarmasyna Narynqol aýylynda «Subaru» markaly kólikti tizgindegen 15 jastaǵy kámeletke tolmaǵan bala rýldi basqara almai, trotýarǵa shyǵyp, jaiaý júrginshilerdi qaqqany týraly aqparat kelip tústi.
Jol-kólik oqiǵasy saldarynan 2008 jyly týǵan alty kámeletke tolmaǵan bala zardap shekti, olardyń beseýi ártúrli dene jaraqatymen aýrýhanaǵa jatqyzyldy.
Atalǵan derek QR QK 345-babynyń 2-bóligi boiynsha aýdandyq politsiiada tirkeldi. Qazirgi ýaqytta saraptamalyq tekserýler taǵaiyndalyp, tergeý áreketteri júrgizilip jatyr. Kólik aiyppul turaǵyna qoiyldy" - deidi Almaty oblysy Politsiia departamentiniń basshysy Baýyrjan Álenov.
Aita keteiik, kámeletke tolmaǵan jasóspirim aǵasyna tiesili kóliktiń kiltin ruqsatsyz alyp, dúkenge aidap shyqqan.
Sputnik Qazaqstan saitynyń jazýynsha, bes jasóspirim jansaqtaý bóliminde jatyr.
"2008 jyly týǵan 6 qyz da mektepten sabaqtan qaityp kele jatqan. Olar bir ýaqytta aýrýhanaǵa jetkizildi. Bir jasóspirimniń jaǵdaiy jaqsy. Ol úiine jiberildi. Al beseýiniń jaǵdaiy aýyr. Beseýi de jansaqtaý bóliminde jatyr. Bir jasóspirimde ishtei qan ketken. Dereý ota jasaldy, qazir jaǵdaiy turaqty. Jasóspirimderdiń aiaq súiekteriniń úlken býyndary synǵan. Jaraqattary aýyr, jalpy jaǵdailary turaqty aýyr. Jol kótere alatyn eki qyzdy Almaty qalasyna jiberip jatyrmyz", - deidi Raiymbek aýdandyq aýrýhanasynyń bas dárigeri Rýslan Kýkkýzov.
Eki jasóspirim qyz Almaty oblystyq klinikalyq balalar aýrýhanasyna jetkiziledi.
"Oqýshylardyń jaǵdaiy Almaty oblystyq densaýlyq saqtaý basqarmasynyń tikelei baqylaýynda", deidi dárigerler.
