Almaty oblysynda jalǵan qujattardy daiyndaýmen jáne ótkizýmen ainalysqan adamdar toby anyqtaldy. Bul týraly "Ult aqparat" Qarjy monitoringi agenttigine silteme jasap habarlaidy.
QR Qarjy monitoringi agenttiginiń Almaty oblysy boiynsha Ekonomikalyq tergeý departamenti qyzmetkerleri Almaty oblysy Eńbekshiqazaq aýdany Prokýratýrasynyń qyzmetkerlerimen birlesip jedel-izdestirý is sharalaryn júrgizý barysynda, QHR kelgen qandas QR azamattaryna áleýmettik jáne zeinetaqy tólemderin alýǵa quqyq beretin jalǵan qujattardy daiyndaýmen jáne ótkizýmen ainalysqan adamdar toby anyqtaldy.
Oqiǵa ornyn tekserý barysynda, QHR-daǵy eńbek ótilin rastaityn qujattar, QHR-nyń ártúrli uiymdarynnyń mór bederleri, notarialdyq qaǵazdar, stanok jáne basqa da zattar tárkilenip alyndy. Atalǵan buiymdardyń kómegimen, ártúrli qosalqy jalǵan qujattar (eńbek kitapshalary, týý týraly kýálikter jáne neke qiiý týraly kýálikter) jasalynǵan.
Atalǵan faktisi boiynsha sotqa deiingi is júrgizý bastaldy. Tergeý amaldary júrgizilýde.
