Almaty oblysynyń Talǵar aýdanynda týystar arasyndaǵy túsinbeýshilik adam ólimimen aiaqtaldy, dep habarlaidy "Ult aqparat".
Almaty oblystyq Politsiia departamenti baspasóz qyzmetiniń málimetinshe, 16 aqpan kúni Talǵar aýdanynyń politsiia bólimine Tuzdybastaý aýylyndaǵy janar-jaǵarmai beketi aýmaǵynda er adamnyń máiiti tabylǵany týraly habar túsken. Oqiǵa ornyna shuǵyl jetken tártip saqshylary qaitys bolǵan adamnyń 48 jastaǵy Baibulaq aýylynyń turǵyny ekenin anyqtaǵan.
«Zorlyqpen óltirý belgileri bar er adamnyń máiiti tabyldy. Osyǵan orai, QR Qylmystyq kodeksiniń 99-babyna sáikes adam óltirý deregi boiynsha qylmystyq is qozǵaldy. Qylmysqa qatysy bar kúdiktini jedel anyqtaý sharalary barysynda 29 jastaǵy jigit ustaldy. Sotqa deiingi tergeý amaldary júrgizilýde. Ózge aqparat tergeý qupiialylyǵyna bailanysty taratylmaidy»,- dedi Talǵar aýdany Politsiia basqarmasynyń bastyǵy Janbolat Ziiadin.
Tergeý barysynda kúdikti qylmys jasaǵanyn tolyǵymen moiyndaǵan. Onyń qaitys bolǵan er adamǵa jaqyn týys ekeni anyqtaldy. Kóp ýaqytqa sozylǵan týystar arasyndaǵy kikiljiń osy qylmysqa ákep soqqan.
«Tergeý barysynda 1992 jyly týǵan jigittiń nege qylmysqa barǵany anyqtalady. Týysymen sózge kelispei qalǵan ol ashýǵa boi aldyryp, qolyndaǵy pyshaqpen dene jaraqatyn salǵany belgili boldy. Is boiynsha tiisti saraptamalar taǵaiyndaldy. Kúdikti ýaqytsha ustaý izoliatoryna qamaýǵa alyndy»,- dep tolyqtyrdy Janbolat Ziiadin.
