Almaty oblysynyń Tekeli qalasynda teńiz deńgeiinen 1200 metr biiktikke elimizdiń kók Týy tigildi. 12 maýsym kúni 12 saǵat 12 minýtta jelbiregen bairaqtyń tuǵyry 12 metr, dep habarlaidy "Ult aqparat".
Tuǵyry biik Tý qalanyń «Kóktóbe» dep atalatyn taý baýraiynda ornalasty. Al memlekettik rámizdi kóterý qurmeti álemdik jáne respýblikalyq dodalarda top jaryp júrgen sportshy jastarǵa berildi. Saltanatty sharaǵa Qazaqstannyń eńbek sińirgen ártisi, kúishi-kompozitor Seken Turysbekov arnaiy qatysyp, birneshe shyǵarmasyn oryndap, jyly lebizin bildirdi.
«Bul - úlken qýat beretin dúnie. Endi ózgelerge de juǵysty bolsa deimin. Bireýdiń jetken jetistigine qyzǵanyshpen qarama, qyzyǵyp qara degen osydan týatyn shyǵar. Osydan keiin balalar tipti basqasha shabyt alatyn shyǵar dep oilaimyn», - dedi Tekeliniń tumsa tabiǵatyna erekshe baǵa bergen óner iesi.
Kenshiler qalasynda Memlekettik týdy ornatý jáne «Kóktóbe» alańyn abattandyrý jumystary «Jumyspen qamtýdyń jol kartasy-2020» memlekettik baǵdarlamasy aiasynda júzege asyryldy. Qala ákimi Baqtiiar Ónerbaev aldaǵy ýaqytta shahardyń ortalyǵynda tuǵyry 25 metr bolatyn taǵy bir biik bairaqtyń jelbireitinin tilge tiek etti.
