Almaty oblysy Talǵar aýdanynyń politseileri taksi júrgizýshisine 37 ret pyshaq suǵyp óltirgen kúdiktini ustady, dep habarlaidy QazAqparat.

17 jeltoqsanda politsiiaǵa Keńdala aýylynyń shetinde er adamnyń máiiti tabylǵandyǵy týraly habarlama túsken.

«Izdeý jumystary kezinde, 18 jeltoqsan kúni saǵat 4:00 shamasynda Keńdala aýylynyń shetindegi ainalma joldyń boiynan, 1200 metr qashyqtyqta azamat S-nyń denesi tabyldy. Tekserý kezinde denesiniń ár jerinen 37 pyshaq jaraqaty bary anyqtaldy. Sol mańnan marqumnyń kóligi de tabyldy», - dep habarlady vedomstovadan.

Belgili bolǵanyndai, kúdikti qylmysty aldyn ala jáne muqiiat oilastyryp qoiǵan. Shabýyl jasaýshy bir rettik abonenttik nómirdi, uialy telefondy paidalanǵan, adam óltirýge bolatyn tynysh jerdi tańdaǵan.

«Kisi óltirdi degen kúdikti 24 jeltoqsan kúni keshke Almatydaǵy Seifýllin kóshesinde «Mega» saýda ortalyǵy ǵimaratyna qarama-qarsy jerde ustaldy. Ustalǵan J. kisi óltirýdi qasaqana jasaǵanyn moiyndady», - delingen politsiia habarlamasynda.

Kúdikti Talǵar aýdandyq politsiia basqarmasynyń ýaqytsha tergeý izoliatoryna qamaldy. Qylmys kezinde kigen qan izderi bar kiimi men báki tárkilendi. Ózge aqparat tergeý múddesine qarai jariia etýge jatpaidy.