Almaty oblysynda sharap zaýyty qaldyqtaryn aýylǵa tógip júr, - dep habarlaidy Tengrinews.kz tilshisi "KTK" telearnasyna silteme jasap.
Almaty oblysynda sharap zaýyty Shalqar aýylynyń shetin óndiristik qaldyqtaryn quiatyn alańǵa ainaldyrǵan. Ainalaǵa jaiylǵan sasyq sýdyń kesirinen eldi mekenge keiinnen qosylǵan turǵyndar jer ýchaskelerine úi sala almai sergeldeńke túsken.
Oǵan qosa, kásiporynnyń qaldyǵynan shyqqan jaǵymsyz iis bútin bir aýylǵa tarap, buqara esik-terezelerin qymtap otyrýǵa májbúr. Sodan jurt shý shyǵardy.
Tilshiniń sózinshe, aýyldyń ishinde ornalasqan sharap zaýytynyń basshysy jumys ornynda joq eken. Kásiporyn qyzmetkerleri esikterin ashpai, suhbat bermeitinderin ashyq aitqan.
Al Jandosov aýyldyq okrýginiń ákimdigi bul máseleden habardar. Atqaminerler ekologtar qaldyq sýdan synama alǵanyn jetkizdi. Biraq onyń qorytyndysy áli shyqpapty. Alyp kásiporynnyń áreketin qazir tiisti organdar tekserip jatyr eken.
"Biz endi tiisti mekemelerge hatpen shyqtyq, sebebi ol jerge qanshalyqty qaldyq sýlardy tógý zańdy, zańdy emes ekenin anyqtaý úshin. Al endi ol jerden ekologiia deportamenti synamasyn aldy. Búgingi tańda sol nátijesi shyqannan keiin, ol endi anyqtalady. Eger ol jerge zańsyz tógilip kelgen bolsa, onda árine jańaǵy departament tarapynan, múmkin aiyppul salynyp, shara qoldanatyn shyǵar", - dedi Jandosov aýyldyq okrýgi ákiminiń orynbasary Láilá Belkáiirova.
Turǵyndar zaýyt qaldyqtaryn en dalaǵa emes káriz júiesine aǵyzsyn degen talap qoidy. Zańsyzdyq toqtamasa shalqarlyqtar kásiporyndy sotqa bermek.
