Almaty oblysyndaǵy joǵary shendi politsiia qyzmetkeri otyrǵan kólikke oq atqan kúdiktiler ustaldy. Bul týraly Almaty oblystyq politsiia departamentiniń baspasóz qyzmeti habarlady.
Politsiia aqparatyna sáikes, osy jyldyń 26 maýsymynda, shamamen saǵat 12-00-de, «Almaty-Óskemen» avtojolynyń 143-shi shaqyrymynda belgisiz adam «Hyundai Santa FE» markaly avtomobildiń salonynan qyzmettik kólikke oq atqan. Atalǵan qyzmettik kólikte Almaty oblystyq politsiia departamentiniń qyzmetkerleri bolǵan.
«Búgin qylmystyq politsiia departamentiniń qyzmetkerleri atalǵan qylmysqa qatysy bar kúdiktilerdiń barlyǵyn anyqtap, ustady. Olarǵa qatysty QR Qylmystyq kodeksiniń 24-babyn qoldana otyryp, 99-baptyń 2-tarmaǵy 1, 2, 7, 8-tarmaqshalarymen qylmystyq is qozǵady. Olardyń taǵy biri QR Qylmystyq kodeksiniń 28-baby 3-tarmaǵymen qylmysty uiymdastyrýshy retinde tanyldy. Qazirgi ýaqytta barlyǵy Almaty oblystyq tergeý oqshaýlaǵyshyna qamaýǵa alyndy», - delingen resmi habarlamada.
Sonymen qatar, politsiia departamenti kúdiktilerdiń biri politsiia qyzmetkeri bolǵan degen aqparatqa qatysty málimetpen bólisti. «Atalǵan azamat qazir politsiia qyzmetkeri emes. Ol erterekte teris qylyqtary úshin ishki ister organdarynan qyzmetten shyǵarylǵan», - dep túsindirdi vedomstvo ókilderi.
