Almaty oblysynda oiyn avtomattaryna milliondap qarjy utylǵan bir top azamat qurylǵylardyń kózin joiýdy talap etýde, dep habarlaidy QazAqparat tilshisi.
Shaǵymdanýshylar ondai avtomattar mekteptiń qasynda, halyq kóp jinalatyn saýda oryndarynda kóp turǵanyn aitady. Al ákimdik avtomattar jóninde zań oryndaryna hat joldaǵan.
Narazylyqy tanytqan turǵyndardyń keibiri oiyn avtomattaryna milliondaǵan aqsha utylǵan. Olardyń aitýynsha, aýyldaǵy dúkenderde terminaldyń 40-50-i tur deidi. Turǵyndar ákimdikke de barǵan, zań oryndaryna da shaǵymdanǵan.
«Talai ata-ana zar jylap otyr, balalary osyǵan kirip ketip. Onyń biri - menmin. Balamdy men ustai almai qaldym. Ózinen ózi aqshasynyń bárin osyndaiǵa joq qylyp, eń aqyry óz-ózine qol jumsap, qaitys boldy», - dedi Turar aýylynyń turǵyny Ońǵarbai Erimbetov.
«Oiyn avtomattary talai otbasyn oirandap ketti», deidi jinalǵandar. «Aptasyna 20 myń, 30 myń tapsam, osyǵan ketedi. Ony bári biledi. Otbasymen ajyrasyp, bala-shaǵamnan aiyrylyp qalamyn, qaityp qosylamyn. Sóitip júrmin», - dedi Shamalǵan aýylynyń turǵyny Azamat Alpysbaev.
«Qanshama urlyq, tóbeles shyǵady. Kerek emes bul, alyp tastasyn. Men oinaǵaly úsh milliondai aqsha salyp tastadym buǵan», - dedi sol aýyldyń turǵyny Salamat Qadyrov.
Úsh million teńge bul - Salamattyń alty aida utylǵan qarjysy. Al taǵy bir jigittiń aǵasy 5 million teńge quiypty.
«Aýyl halqynan shaǵym jii túsedi» degen ákimdik avtomattardyń jumysyn toqtata almai otyr.
«Ekonomikalyq tergeý departamentine hat joldadym. Maǵan jaýap ta keldi, mine, resmi hatym bar. Bul avtomattardyń barlyǵy - lotoreia delingen, bunyń barlyǵyn zańǵa sáikes tekserdik degen olar», - dedi Qarasai aýdany Jibek joly okrýgi ákiminiń orynbasary Almat Qalabaev.
«Qurylǵylardyń iesinen dúken ieleri ai saiyn aqy alady» deidi narazy top. Osylaisha, oiyn avtomattarynan ábden utylǵandar qurylǵylardyń kózin joiýdy talap etýde.
