Foto: pixabay.com
Almaty oblysyndaǵy aýyldardyń birinde 14 jastaǵy mektep oqýshysy 53 jastaǵy dene shynyqtyrý pániniń muǵaliminiń ústinen shaǵymdanǵan. Qyzdyń aitýynsha, muǵalim qyzdy jumys kabinetine kirgizip tiisken. Alaida politsiiaǵa bergen aryzdan keiin er adam ustalǵan joq, onyń ornyna tergeýshiler qyzdan túngi úshke deiin jaýap alǵan, - dep habarlaidy Tengrinews.kz saity.
Oqiǵa týraly aqparat "Ne molchi" qorynyń Instagram-paraqshasynda paida boldy. Al Tengrinews.kz tilshisi zardap shekken qyzdyń ákesine habarlasqan.
Er adamnyń aitýynsha, oqiǵa 3 sáýirde Almaty oblysyndaǵy aýyl mektepteriniń birinde voleibol sabaǵynyń aldynda bolǵan.
"2 mamyrda maǵan burynǵy áielim telefon soǵyp, úlken qyzymyzǵa dene shynyqtyrý pániniń muǵalimi tiiskenin aitty. Men mektepke kelgende onda politsiia qyzmetkerleri, mektep direktory, qyzym, onyń anasy boldy. 3 sáýirde voleibol sabaǵynda muǵalim ony bólmege shaqyrǵan, qasynda bir qyz bolǵan, olar birge kelgen, biraq muǵalim ekinshi qyzdy jattyǵý zalyna qaitaryp jibergen, qyzymmen jalǵyz sóileskisi keletinin aitty.
Ol ony kabinetke kirgizip, esikti, perdelerdi jaýyp: "Seni nege jibergim kelmeitinin bilesiń be? Nege ekenin ózim de bilmeimin" dep aita bastaǵan. Denesin ustai bastaǵan, bl saǵat 18:00 shamasynda boldy, al voleibol sabaǵy 19:00-de bastaldy. Qyzym óte tynysh jáne sabyrly. Ol qyzymnan ony súiip, denesin ustai alamyn ba dep suraǵan. Qyzym joq degen. Biraq ol bul áreketterin jalǵastyrǵan. Qudaiǵa shúkir, eshteńe bolǵan joq, álgi qyz júgirip kelip, dálizde atyn aiǵailap izdei bastaǵan. Ol: "Seni izdep jatyr, shyq" degen. Keiin esikti ashyp, shyǵaryp jibergen", - deidi oqýshynyń ákesi.
Oqiǵadan keiin qyzdyń voleibol sabaǵyna barýǵa batyly jetpegen. Úsh sabaqty jibergen soń anasy onyń sebebin bile bastaǵan, qyz kózine jas alyp, bolǵan jaidy aityp bergen.
Qyzdyń ákesiniń aitýynsha, mekteptegi dene shynyqtyrý pániniń muǵalimi taǵylǵan aiyptyń barlyǵyn joqqa shyǵarǵan.
"Ol únsiz turyp tyńdady. Keshke bizdi politsiiaǵa alyp ketti. Saǵat 20:30-da tergeý bastaldy, olar tańǵy úshke deiin qyzymdy jaýapqa tartty. Men dálizde boldym, qasynda anasy, mektep direktory jáne qyz boldy. Muǵalim bolmady, úiine ketip qalǵan siiaqty. 124-bap boiynsha qylmystyq is qozǵaldy. Biraq is múlde alǵa jyljymady", - dep ashýlandy oqýshy qyzdyń ákesi.
Er adam qyz zorlanbaǵanyn aitqanyna qaramastan, politseiler onyń páktigin tekserý úshin tekserýden ótýge májbúrlegenin aitty.
"Mektepte beinekamera bar, bul videolardy politsiia alǵan joq, men ózim júktep aldym. Videoda olar kabinetke kiredi, syrtynan onyń perdelerdi qalai japqany kameraǵa túsirip alǵan. Sosyn álgi qyz júgirip keledi. Videoda kabinetten aldymen qyzym shyǵady, keiin muǵalim shyǵady. Bári meniń qyzym aitqandai boldy. Biraq muǵalim bárin joqqa shyǵaryp jatyr. Al tergeýshi bailanysqa shyqpaidy", - dedi ol.
Sonymen qatar, qyz Almatyda psihologtardyń birqatar tekserýinen ótti. Olar onyń ótirik aitpaǵanyn rastady.
Er adam tergeý barysynda muǵalimge eshqandai jaza qoldanylmaǵanyna ashýly.
"Qalai sabaq berip júrdi, solai berip júr, sabaqtan shettetilgen joq. Tergeý kezinde ony ustaý kerek edi. Bizdi áielimmen birge ákimdikke shaqyrdy, aýyl ákimi, týystary, muǵalimderi bar. Men odan "Nege? Siz ony kabinetke kirgizdińiz, ne úshin?" dep suradym. Ol maǵan qarap, "Bilmeimin" deidi. Ol 53 jasta, qyzym qazir sabaqqa barmaidy, qorqady, úiden shyqpaidy", - dep shaǵymdandy er adam.
Almaty oblystyq bilim basqarmasynyń baspasóz qyzmeti ókilderi 2023 jylǵy 2 mamyrda mektep direktorynyń tárbie isi jónindegi orynbasaryna qyzdyń ata-anasy telefon shalyp, voleibol sabaǵynda dene shynyqtyrý pániniń muǵalimi oqýshyǵa tiiskenin habarlady.
"Osy derek boiynsha ýchaskelik politsiia qyzmetkeri shaqyryldy. Politsiiaǵa habarlasý týraly sheshim qabyldandy. 2023 jylǵy 3 mamyrda politsiiaǵa qylmystyq quqyqbuzýshylyq deregi tirkeldi. Sol kúni mektep ákimshiligi dene shynyqtyrý pániniń muǵalimine sógis jariialaý týraly sheshim qabyldady. 2023 jylǵy 16 mamyrda dene shynyqtyrý pániniń muǵalimi mektep ákimshiligine aýrýhanada jatqanyn eskertip, jumysqa shyqpaǵan", - dedi vedomstvo ókilderi.
Sodan beri jáne osy ýaqytqa deiin muǵalim eńbek demalysynda boldy.
Vedomstvo bul is boiynsha tergeý júrip jatqanyn aitty. Oqýshyǵa psihologiialyq kómek kórsetiledi.
Balalar ombýdsmeni Arýjan Sain bolǵan jaittan habardar ekenin, biraq tergeý barysynda istiń mán-jaiyn asha almaitynyn, biraq isti baqylaýda ustaitynyn aitty.
Aita keteiik, Qylmystyq kodekstiń 124-babynyń 2-bóligi "Jas balaǵa qatysty ata-anasy, ógei ákesi, ógei sheshesi, pedagog ne ony tárbieleý jónindegi mindetter Qazaqstan Respýblikasynyń zańymen júktelgen ózge adam jasaǵan dál sol is-áreket" boiynsha belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyra otyryp, on jyldan 15 jylǵa deiingi merzimge bas bostandyǵynan aiyrý túrindegi jaza kózdelgen.
