Foto: QR OAM
Jańa oqý jylynan bastap Almaty oblysynyń mektepteri men kolledjderinde quqyqtyq mádeniet boiynsha qosymsha sabaqtar ótkiziledi. Bul joba Memleket basshysynyń tapsyrmasymen «Zań jáne tártip» ideologiiasy aiasynda júzege asyrylady, dep habarlaidy Ult.kz.
Pilottyń birinshi kezeńinde qosymsha sabaqtar Talǵar aýdanyna qarasty 10 mektep pen 3 kolledjde engiziledi. Jobanyń basty maqsaty – oqýshylardyń quqyqtyq sanasyn qalyptastyrý, zańdy qurmetteýge úiretý, sonymen qatar zorlyq-zombylyq, býlling jáne ózge de quqyqbuzýshylyqtardyń aldyn alý.
Sabaqtardy arnaiy daiyndyqtan ótken, prokýratýra jáne politsiiada qyzmet etken tálimgerler júrgizedi. Tálimgerlerdi oqytý 7–8 tamyz kúnderi bastalady.
«Biz quqyqtyq sananyń negizin mektep qabyrǵasynan bastap qalaimyz. Tálimgerler balalarǵa óz quqyqtary men mindetterin túsindirip qana qoimai, zańdy qurmetteýge, jaýapkershilikti sezinýge jáne syndarly minez-qulyq daǵdylaryn qalyptastyrýǵa kómektesedi. Bul – bolashaqta ornyqty quqyqtyq mádenietti qalyptastyrýdyń kilti», – dep atap ótti QR Oqý-aǵartý ministrligi Balalardyń quqyqtaryn qorǵaý komitetiniń tóraǵasy Nasymjan Ospanova.
Pilottyq mektepter men kolledjderde oqý jylynda 7–10 synyp oqýshylary men kolledj stýdentteri úshin barlyǵy 36 sabaq ótkizý josparlanǵan. Sabaqtar eki aptada bir ret ótip turady, aldyn ala jáne qorytyndy diagnostika jáne oqýshylardyń minez-qulqyna turaqty monitoring júrgiziledi.
Ádistemelik materialdardy QR Oqý-aǵartý ministrligine qarasty «Órken» balalardyń ál-aýqatyn arttyrý jónindegi ulttyq ǵylymi-praktikalyq institýty Bas prokýratýra janyndaǵy Quqyq qorǵaý organdary akademiiasymen birlesip ázirlegen. Aldaǵy ýaqytta joba elimizdiń ózge óńirlerinde de jalǵasyn tabady dep josparlanýda.
