Foto: Almaty.tv
«Tar kóshemizdi keńeitemiz dep, aiyppul arqaladyq». Talǵar aýdany Panfilov aýyldyq okrýgine qarasty Qarabulaq aýylynyń turǵyndary osylai dep shaǵym aitty, dep habarlaidy Almaty.tv tilshisi.
Turǵyndardyń sózine sensek, tar kósheniń boiymen júitkigen kólik te, oinaq salǵan bala da, jasy kelgen qariia da qatar júrýge májbúr. Munda jol-kólik oqiǵalary da jii tirkeledi eken. Sondyqtan jergilikti belsendi turǵyndardyń bastamasymen joldy keńeitpek bolǵan.
"Kóshemiz óte tar. Men munda jiyrma jyldan beri turamyn. Buryn kólik sirek edi. Al qazir ary-beri qatynaityndar óte kóp. Jaqyn mańda mektep bar, balalarǵa da qiyn. Qysta abaisyzda aiaqtary taiyp, kólik qaǵyp kete me dep taǵy alańdaimyz. Sondyqtan kóshemizdi keńeitkimiz kelgen", – deidi Qarabulaq aýylynyń turǵyny Olga Kýklicheva.
Turǵyndardyń aitýynsha, qarabulaqtyqtar ózara jinalys ótkizip, kópshilik «joldy keńeitý qajet» degen uiǵarymǵa kelgen. Sol jerde qol jinap, toltyrylǵan hattamany jergilikti ákimdikke tapsyrǵan. Biraq qurylys jumystary bastalǵanda ýchaskelik politsiia kelip, belsendi turǵynnyń birine ákimshilik aiyppul salyp ketken.
"Kórshimizdiń eshqandai kinási joq. Tek igi is jasaimyn degen oiy bolǵan. Biraq aiyppul arqalap qaldy. Máselen, men ózim mundai iske aralaspaityn edim. Al ol kisi barlyq jaýapkershilikti óz moinyna alyp, kórshilerine jaqsylyq jasaǵysy kelgen. Jaǵdaidyń bulai bolǵany ókinishti", – deidi Olga Kýklicheva.
Alaida kórshisin jaqtaǵandardan bólek, dattaǵandar da tabyldy. Keibiriniń sózine sensek, zeinetker jergilikti bilik ókilderiniń halyq úshin atqarǵan isin únemi joqqa shyǵarýmen kelgen.
"Aýyldyqtardyń jaǵdaiyn oilap, qamyn jeitin adam bolyp kóringisi keledi. «Qarabulaqtyń jaǵdaiyn men jasap otyrmyn» deidi. Al negizi kóshege jaryq qoiyp, jol salǵan - ákimdik qyzmetkerleri", – deidi Qarabulaq aýylynyń turǵyny Gúlshat Halilova.
Al Panfilov aýyldyq okrýginiń ákimshiligindegilerdiń aitýynsha, turǵynǵa aiyppul infraqurylym nysandarynyń buzylyp, jasyl jelektiń zaqymdanǵany úshin salynǵan.
"Ákimdik qyzmetkerleri bul kisige aýyzsha eskertý jasaidy. Biraq bul kisi kónbegendikten, kelesi kúni biz jergilikti politsiia bólimi qyzmetkerin jiberip, aiyppul salyndy. Sondai-aq gaz qubyryn temirmen kótergen, – dedi Panfilov aýyldyq okrýginiń ákimi Dýlat Dáýletáliev.
Aýyldyq okrýg ákiminiń sózinshe, Qarabulaq halqynan ótinish túspegen. Eger turǵyndar tarapynan mundai usynys aitylsa, iske asyrýǵa daiyn ekenderin jetkizdi.
