فوتو: Almaty.tv
«تار كٶشەمٸزدٸ كەڭەيتەمٸز دەپ, ايىپپۇل ارقالادىق». تالعار اۋدانى پانفيلوۆ اۋىلدىق وكرۋگٸنە قاراستى قارابۇلاق اۋىلىنىڭ تۇرعىندارى وسىلاي دەپ شاعىم ايتتى, دەپ حابارلايدى Almaty.tv تٸلشٸسٸ.
تۇرعىنداردىڭ سٶزٸنە سەنسەك, تار كٶشەنٸڭ بويىمەن جٷيتكٸگەن كٶلٸك تە, ويناق سالعان بالا دا, جاسى كەلگەن قارييا دا قاتار جٷرۋگە مەجبٷر. مۇندا جول-كٶلٸك وقيعالارى دا جيٸ تٸركەلەدٸ ەكەن. سوندىقتان جەرگٸلٸكتٸ بەلسەندٸ تۇرعىنداردىڭ باستاماسىمەن جولدى كەڭەيتپەك بولعان.
"كٶشەمٸز ٶتە تار. مەن مۇندا جيىرما جىلدان بەرٸ تۇرامىن. بۇرىن كٶلٸك سيرەك ەدٸ. ال قازٸر ارى-بەرٸ قاتىنايتىندار ٶتە كٶپ. جاقىن ماڭدا مەكتەپ بار, بالالارعا دا قيىن. قىستا ابايسىزدا اياقتارى تايىپ, كٶلٸك قاعىپ كەتە مە دەپ تاعى الاڭدايمىز. سوندىقتان كٶشەمٸزدٸ كەڭەيتكٸمٸز كەلگەن", – دەيدٸ قارابۇلاق اۋىلىنىڭ تۇرعىنى ولگا كۋكليچەۆا.
تۇرعىنداردىڭ ايتۋىنشا, قارابۇلاقتىقتار ٶزارا جينالىس ٶتكٸزٸپ, كٶپشٸلٸك «جولدى كەڭەيتۋ قاجەت» دەگەن ۇيعارىمعا كەلگەن. سول جەردە قول جيناپ, تولتىرىلعان حاتتامانى جەرگٸلٸكتٸ ەكٸمدٸككە تاپسىرعان. بٸراق قۇرىلىس جۇمىستارى باستالعاندا ۋچاسكەلٸك پوليتسييا كەلٸپ, بەلسەندٸ تۇرعىننىڭ بٸرٸنە ەكٸمشٸلٸك ايىپپۇل سالىپ كەتكەن.
"كٶرشٸمٸزدٸڭ ەشقانداي كٸنەسٸ جوق. تەك يگٸ ٸس جاسايمىن دەگەن ويى بولعان. بٸراق ايىپپۇل ارقالاپ قالدى. مەسەلەن, مەن ٶزٸم مۇنداي ٸسكە ارالاسپايتىن ەدٸم. ال ول كٸسٸ بارلىق جاۋاپكەرشٸلٸكتٸ ٶز موينىنا الىپ, كٶرشٸلەرٸنە جاقسىلىق جاساعىسى كەلگەن. جاعدايدىڭ بۇلاي بولعانى ٶكٸنٸشتٸ", – دەيدٸ ولگا كۋكليچەۆا.
الايدا كٶرشٸسٸن جاقتاعانداردان بٶلەك, داتتاعاندار دا تابىلدى. كەيبٸرٸنٸڭ سٶزٸنە سەنسەك, زەينەتكەر جەرگٸلٸكتٸ بيلٸك ٶكٸلدەرٸنٸڭ حالىق ٷشٸن اتقارعان ٸسٸن ٷنەمٸ جوققا شىعارۋمەن كەلگەن.
"اۋىلدىقتاردىڭ جاعدايىن ويلاپ, قامىن جەيتٸن ادام بولىپ كٶرٸنگٸسٸ كەلەدٸ. «قارابۇلاقتىڭ جاعدايىن مەن جاساپ وتىرمىن» دەيدٸ. ال نەگٸزٸ كٶشەگە جارىق قويىپ, جول سالعان - ەكٸمدٸك قىزمەتكەرلەرٸ", – دەيدٸ قارابۇلاق اۋىلىنىڭ تۇرعىنى گٷلشات حاليلوۆا.
ال پانفيلوۆ اۋىلدىق وكرۋگٸنٸڭ ەكٸمشٸلٸگٸندەگٸلەردٸڭ ايتۋىنشا, تۇرعىنعا ايىپپۇل ينفراقۇرىلىم نىساندارىنىڭ بۇزىلىپ, جاسىل جەلەكتٸڭ زاقىمدانعانى ٷشٸن سالىنعان.
"ەكٸمدٸك قىزمەتكەرلەرٸ بۇل كٸسٸگە اۋىزشا ەسكەرتۋ جاسايدى. بٸراق بۇل كٸسٸ كٶنبەگەندٸكتەن, كەلەسٸ كٷنٸ بٸز جەرگٸلٸكتٸ پوليتسييا بٶلٸمٸ قىزمەتكەرٸن جٸبەرٸپ, ايىپپۇل سالىندى. سونداي-اق گاز قۇبىرىن تەمٸرمەن كٶتەرگەن, – دەدٸ پانفيلوۆ اۋىلدىق وكرۋگٸنٸڭ ەكٸمٸ دۋلات دەۋلەتەليەۆ.
اۋىلدىق وكرۋگ ەكٸمٸنٸڭ سٶزٸنشە, قارابۇلاق حالقىنان ٶتٸنٸش تٷسپەگەن. ەگەر تۇرعىندار تاراپىنان مۇنداي ۇسىنىس ايتىلسا, ٸسكە اسىرۋعا دايىن ەكەندەرٸن جەتكٸزدٸ.
