24 shilde kúni Almaty oblysynyń Talǵar qalasynda kóshede kókpar tartqandar ustaldy, dep habarlaidy QazAqparat.
«50 jastaǵy Keńdala aýylynyń turǵyny óziniń týǵan kúnine orai kókpar uiymdastyrǵan. Biraq shara ákimdikpen kelisilmegen. Kókpar oiyny qystaqtan bastalyp, qalanyń kóshesinde jalǵasyp ketken. Kólikterdiń qozǵalysyna kedergi keltirip, qoǵamdyq tártipti buzǵandardyń barlyǵy anyqtaldy. 10 adam ustalyp, QR Ákimshilik kodekstiń 434, 593 jáne 614-baptary boiynsha jaýapkershilikke tartyldy», - delingen Almaty oblystyq Politsiia departamenti baspasóz qyzmetiniń habarlamasynda.
Keiin kókparǵa qatysqandar halyqtan keshirim surady.
«24 shilde kúni kókpar bolýyna bailanysty sonda bardym. Kókpar barysynda Talǵardyń kóshesine shyǵyp ketip, avtokólikterdiń qozǵalysyna kedergi keltirgenimiz úshin Talǵar turǵyndarynan keshirim suraimyn», - dedi kókparǵa qatysqan Turar Rysqulov aýylynyń turǵyny, 24 jastaǵy Dáýren Janmyrzaev.
Ulttyq oiynnyń ózge de qatysýshylary turǵyndardan keshirim surap, endi ondai áreketke barmaityndaryn aitty.
