Elimizdiń aimaqtarynda kómir tapshylyǵy áli sheshilgen joq. Ásirese, Almaty oblysynda kúnniń erekshe sýytýy saldarynan, bul problema odan ári qiyndap ketti, dep habarlaidy Baq.kz aqparat agenttigi.
Búginde airyqsha aiazdy kúnderdi bastan keship jatqan Almaty oblysynda kómir tapshylyǵy anyq seziledi. Kóptegen adam kómirdiń joqtyǵynan sýyq úide otyr. Kómir satatyn bazalarda júk mashinalarynyń kezekke talasyp, bir-birimen soqtyǵysyp jatqany týraly video áleýmettik jelilerde tarap jatyr. Solardyń birin belgili bloger Janna Ilicheva óziniń Feisbýktegi paraqshasynda jariialap, bul másele týraly post jazdy.
Onyń aitýynsha, aiazdy kúnderi kórshileri sýyq úide otyr. Sonymen qatar, ol oblystyń aimaqtaryna jetkiziletin kómir tapshy ári satyp alýǵa esh múmkindik joq ekenin jazǵan.
«Jaqynda maǵan kómir jetkizetin bir júrgizýshiniń nómirin berdi. Men ony aiazda jylýsyz otyrǵan ózimniń kórshilerime tarattym. Olar habarlassa, júrgizýshi kómir joq ekenin jáne aidyń sońyna deiin bolmaitynyn aitqan», - dep jazdy bloger.
Janna Ilicheva jariialaǵan videoda kómir satatyn bazalardyń birinde júk mashinalary kezekke talasyp, tipti bir-birin soǵyp jatqanyn kórýge bolady.
Almaty oblysynda kómir jetispeýshiligi byltyrǵy kúz ailarynda bastalyp, másele áli kúnge sheshilmei kele jatyr. Oǵan qosa kómirdiń baǵasy ótken jylǵymen salystyrǵanda aitarlyqtai qymbattap ketken. Máselen, Ranking.kz basylymynyń esepteýi boiynsha, kómirdiń baǵasy bir jyl ishinde otyz paiyzǵa jýyq kóterilgen.
