Almaty oblysynda kez-kelgen adam aqsha tólemei azyq-túlik alatyn sóre ashyldy.
«Jan jylýy mekeni» dep atalatyn jerde dastarhanǵa asa qajettiniń bári bar. Jetisý jeriniń isker áielderi qolǵa alǵan qaiyrymdy sharanyń basty maqsaty - adamdardyń bir-birine jylý syilap, muqtaj janǵa qol ushyn berý, - dep habarlaidy QazAqparat.
Tekeli qalasynyń turǵyny Dana Óskenbaeva bes balanyń anasy. Kishkentaiynyń kútimimen úide otyrǵan ol, alatyn járdemaqysynyń azyq-túlikten artylmaitynyn aitady. Al qymbatshylyq qysqan zamanda dúken ishinen ashylǵan sóredegi taýar halyqqa naǵyz kómek dep sanaidy.
«Ai saiyn óz basym 70 myń teńgeden asa qarajatty azyq-túlikke jumsaimyn. Osy jerden tegin qant, kespe, shái aldym. Bul bizge úlken kómek. Osyny uiymdastyryp otyrǵan adamdarǵa alǵysymdy aitamyn», - dedi Dana Óskenbaeva.
Uiymdastyrýshylar «jan jylýy mekeni» dep atalatyn sórege kez kelgen adam óz úlesin qosa alatynyn aitady. Iaǵni, dúkenge kelgen jan satyp alǵan zatyn osy sórege qaldyrýǵa bolady. Al sharanyń negizgi maqsaty muqtaj jandarǵa qamqorlyq kórsetý.
«Bir-birimizge kómek kórsetý basty maqsatymyz. Ár qazaǵym jalǵyzym deidi. Tek qana baqýatty adamdar ǵana meiirimdilik kórsete almaidy, bári kórsetý kerek. Eki shokolad alyp, bir shokoladty osynda qoiyp, bir shokoladty ózi jese ol balalarǵa úlken tárbie dep oilaimyn», - dedi Almaty oblystyq isker áielder keńesiniń múshesi Almagúl Ońǵarbaeva.
Almaty oblysynyń isker áielderi tegin azyq-túlik sóresin ázirge nan, qant, kespe, shái siiaqty dastarhanǵa eń qajetti ónimdermen toltyrǵan. Al aldaǵy ýaqytta mundai sórelerdi Almaty oblysynyń barlyq óńirlerinde ashsaq degen josparlary bar jáne onyń ishindegi taýarlardy da túrlendire túspek.
