Jol qozǵalysy erejelerin buzýdyń aldyn alý men jol-kólik oqiǵalarynyń sanyn azaitý maqsatynda oblys aýmaǵynda «Qaýipsiz jol» jedel aldyn alý is-sharasy ótýde.
«On segiz kún ishinde oblys boiynsha barlyǵy 29 myń 72 ákimshilik quqyq buzýshylyq anyqtaldy. Oblys boiynsha kólik quraldaryn tiisti ruqsatsyz qaita jabdyqtaǵany úshin barlyǵy 88 júrgizýshi jaýapqa tartyldy. 590-baptyń 9-bóligi boiynsha memlekettik nemese mindetti tehnikalyq baiqaýdan ótpegen 1083 júrgizýshi ákimshilik jaýapkershilikke tartyldy», – deidi Almaty oblysy PD Jergilikti politsiia qyzmeti basqarmasynyń bastyǵy, politsiia polkovnigi Baǵdat Áshimov.
Almaty oblysy politsiia departamentiniń málimetinshe, jaiaý júrginshilerdiń qatysýymen bolǵan jol-kólik oqiǵasyna jol bermeý maqsatynda 600-bap boiynsha Ákimshilik quqyq buzýshylyq týraly barlyǵy 480 hattama jasaldy. Sondai-aq, 615-bap boiynsha jaiaý júrginshilerge qatysty ákimshilik quqyq buzýshylyq týraly 4104 hattama toltyrylǵan.
«Jedel aldyn alý is-sharasyn ótkizý kezeńinde oblys avtojoldarynda 36 jol-kólik oqiǵasy tirkeldi. Onyń ishinde Respýblikalyq mańyzy bar avtojoldarda – 24, jergilikti jelilerde – 12. Oqiǵa saldarynan 14 adam qaza taýyp, 42 adam jaraqat aldy. Osyǵan bailanysty oblys turǵyndary men qonaqtarynan jol júrý erejelerin saqtaýdy suraimyz. Sizdiń qaýipsizdigińiz – sizdiń qolyńyzda», – dep atap ótti Jergilikti politsiia qyzmeti basqarmasynyń bastyǵy B.Áshimov.
Aita ketsek, buǵan deiin Almaty oblysynyń politseileri jol qozǵalysyna qatysty balalarǵa da úndeý joldady.
Óńirdegi politsiia qyzmetkerleri turǵyn úi aýlalarynda, atap aitqanda balalar jaz mezgilinde jii oinaityn jerlerde profilaktikalyq is-sharalar ótkizýde.
«Jergilikti politsiia qyzmetkerleri kóp páterli úilerdiń aýlalarynda profilaktikalyq is-sharalar ótkizip jatyr. Tártip saqshylary ata-analarǵa ózderin jáne balalaryn qaýipten qalai qorǵaýǵa bolatyndyǵy týraly broshiýralar men paraqshalar taratady. Kóp jaǵdailarda balalar ózderiniń tentektigine bailanysty kólikterdi baiqamai qalyp jatady, bul qaiǵyly jaǵdaiǵa ákelýi múmkin», – deidi Baǵdat Áshimov.
Jazda barlyq aýlalarda balalar velosiped, samokat nemese rolik tebedi. Eger olar qaýipsizdik erejelerin saqtamasa, qiyndyqqa tap bolýy múmkin. Ata-analar muny árdaiym este ustap, otbasynda túsindirý jumystaryn júrgizýi kerek.
«Balalar úshin qaýipsizdikti aldyn-alýdyń eń durys joly – úide beriletin aqyl-keńes. Eske sala ketsek, biyl Sharyn shatqalyndaǵy bolǵan sel kezinde kishkentai qyz anasynyń uiqtar aldynda aitqan keńesteriniń arqasynda qutqaryldy. Bul rette ata-analardan eresek balalardy qaraýsyz qaldyrmaýdy suraimyz. Olarmen túrli jaǵdaida bolýatyn qaýipter týraly profilaktikalyq áńgimeler júrgizińiz», – dep atap ótti polkovnik B.Áshimov.
