Almaty oblysynda transulttyq qylmystyq toptyń músheleri ustaldy. Bul týraly Almaty oblysy prokýratýrasynyń baspasóz qyzmeti habarlady.
Bul oqiǵa 27 qyrkúiek kúni Almaty oblysy boiynsha ishki ister Departamenti uiymdasqan qylmysqa qarsy kúres basqarmasynyń qyzmetkerlerimen jedel-izdestirý sharalary barysynda anyqtaldy. Almaty oblysy Alakól aýdany Dostyq beketiniń shetinde «Mitsýbisi-Padjero» markaly avtokóliginde otyrǵan Qytai Halyq Respýblikasynan zańsyz jolmen taýar tasymaldap, keden aýmaǵynda belsendi qimyl-áreket jasap júrgen transulttyq uiymdasqan qylmystyq toptyń 3 múshesi quryqtaldy. Olardan «PM» men «Strimmer» markaly 2 travmatikalyq pistolet jáne olarǵa arnalǵan oq-dáriler, tegis uńǵyly myltyqtyń kesindisi (obrez), sonymen birge sirińke qorapshalaryna jáne polietilen qaptaryna salynǵan ótkir iisti bar sarǵysh tústi untaqtar men ósimdik zattekteri tabylyp, alyndy.
Kúdiktiler sol kúni QR QPK-tiń 128 babyna sáikes ýaqytsha ustaý izoliatoryna qamaldy.
Atalǵan jailar boiynsha kórsetilgen azamattarǵa qatysty QR QK-niń 287 baby 4 bóligimen (adamdar tobynyń aldyn ala sóz bailasýymen nemese birneshe ret qarýdy, oq-dárilerdi, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý nemese alyp júrý) sotqa deiingi tergep-tekserý óndiristeri tirkeldi.
Qazirgi ýaqytta atalǵan óndiris boiynsha tergeý júrgizilýde.
