Foto: © Sputnik
Almaty oblysy Qarasai aýdany Kóldi aýylynda itterdi soiatyn oryn tabyldy. Ony tapqan volonterlerdiń aitýynsha, it eti saýdaǵa shyǵarylýy múmkin, dep habarlaidy Sputnik Qazaqstan.
Anastasiia Malygina esimdi turǵyn óziniń asyl tuqymdy itin it aýlaýshylar alyp ketkenin estip, izdeý salady. Kómekke volonterlerdi shaqyrady.
"Men it aýlaýshylarǵa habarlastym. Olar qandai it dep surady. Men fotosyn jiberdim. Olar maǵan "bul it emes, qoi ǵoi" dep mazaq qylǵandai jaýap berdi. Sol kúii itimdi tappadym", - deidi Malygina.
It aýlaýshylar mekemesine barǵan volonterlerdi jumysshylar bir saǵat kúshpen ustaǵan. Tipti qoqan-loqy kórsetip, qol jumsaǵan.
Foto: © Sputnik
"Bizdi bylapyt sózdermen balaǵattap, kóligimizdiń esigin urǵylady. Jolymyzdy jaýyp júrgizbei tastady", - deidi Mina Ismailova.
Odan keiin volonterler oqshaý turǵan jerdi taýyp alǵan. Ol it soiatyn oryn bolyp shyqty. Olar kelgen boida 17 itti bosatqan.
Foto: © Sputnik
"Itterdiń bas súiegi jatty. Keibir bas súiek jańa soiylǵan ittiki. Munda mine, pyshaq, itti uratyn temir taiaq, qural-jabdyqtyń bári bar. Mine qarańyzdar - jańa aqqan qannyń izderi", - deidi Ismailova.
It soiatyn orynda gaz ballony men tarazy da tur.
Foto: © Sputnik
"Etti únemi bir mashina áketip júrgen. It aýlaýshylar osynda ákep soiyp, bólshekteidi. Ol etti basqa bireý áketedi. Káris ultynyń ókili belgisiz azamat áketip otyrady. Paketter óte kóp boldy munda. Sol paketterge salyp tasidy. Ana jerde etterdi ólsheitin tarazy da tur", - deidi volonterler.
Al "Senim-meiirim" qoǵamdyq qorynyń ókili Zinaida Sevenkova aitýynsha, bul - uiymdasqan qylmys. Itterdi jaýyzdyqpen aýlap óltirgen. Al buǵan memleketten bólingen qarajat kimniń qaltasyna ketip jatqany belgisiz.
"Jaqynda ǵana Talǵar janyndaǵy baktan 100-den astam ittiń qaldyǵy salynǵan qaptar tabyldy. Mundai jaǵdai Eńbekshiqazaqta da boldy. 2020, 2021 jyly da osy problemany aityp dabyl qaqtym. Etti qaida jiberip jatqanyn quqyq qorǵaý organdary anyqtaýy kerek. Oblys basshylyǵy biledi, biraq quqyq qorǵaý organdaryna itere salady. Jaýyzdyqpen áreket etetin it atýshylardy jumysqa alyp otyr, ekinshiden bul bizneske ainalǵan. Bul jerde bir emes, birneshe adamnyń qatysy bar. Men buny resmi túrde jariia etip aitamyn", - deidi ol.
Politsiia bul is boiynsha tergeý bastalǵanyn habarlady. Al Kóldi aýylynyń ákimi Serik Qalijanuly aýyl mańyndaǵy it soiatyn oryndy birinshi ret kórgenin aityp otyr. Jaǵdaidy egjei-tegjei teksergen soń qosymsha málimet beredi.
