Jarkent túbindegi dala órtin sóndirý kezinde qaza tapqan úsh adam memlekettik nagradaǵa usynylady. Sonymen qatar olardyń bireýine memlekettik qordan turǵyn úi beriledi, dep habarlady Almaty oblysy ákiminiń baspasóz qyzmeti.
Esterińizge sala keteiik, Panfilov aýdanynda bolǵan dala órti kezinde 7 adam zardap shegip, 3 adam kóz jumǵan bolǵan edi. Búgin Almaty oblysynyń ákimdigi zardap shekkenderdiń densaýlyq jaǵdaiy jaily aitty.
"Keshe Panfilov aýdandyq ortalyq aýrýhanasyna 7 adam jetkizilgen. Onyń 5-eýi ambýlatoriialyq em alý úshin úiine qaitaryldy, ekeýi aýrýhanada. Bireýi – jansaqtaý bóliminde, ekinshisi – hirýrgiialyq bólimde. Olardyń jaǵdaiy birqalypty", - delingen baspasóz qyzmetiniń habarlamasynda.
Sonymen qatar qaza bolǵan úsh azamatty jerleýge kómek kórsetiletini aityldy.
"Qaza bolǵandardyń ekeýi búgin, úshinshisi erteń jerlenedi. Almaty oblysy ákiminiń tapsyrmasy boiynsha olardyń otbasylaryna barlyq qajetti kómek kórsetiledi. Marqumdar memlekettik nagradaǵa usynylady. Sondai-aq qaza bolǵandardyń biri 1984 jyly týǵan azamattyń otbasyna memlekettik qordan turǵyn úi beriledi", - dedi baspasóz qyzmeti.
Marqumdardyń biri – Jarkent orman sharýashylyǵy mekemesiniń qyzmetkeri, ekeýi – órt sóndirýge kómektesken jergilikti turǵyn.
Órtti sóndirý úshin sýaǵar qurylǵysy bar MI-8 tikushaǵy jumyldyrylǵan.
"Apat kezinde aýa raiy qolaisyz boldy. Saldarynan ainalany kórý qiyndady, óte kóp kúsh jumsaldy", - dep habarlady IIM.
