video kadry
Almaty – Óskemen tasjolynyń 94-shaqyrymynda birneshe kólik qatysqan aýyr jol apaty oryn alyp, saldarynan eki adam qaza tapty. Taǵy eki adam túrli jaraqatpen aýrýhanaǵa jetkizildi, dep habarlady Almaty oblysy Politsiia departamenti.
Resmi málimetke sáikes, Changan kóliginiń júrgizýshisi rólge ie bola almai, alda bir baǵytta ketip bara jatqan júk kóliginiń tirkemesine soǵylǵan. Qatty soqqydan keiin jeńil kólik jol jiegindegi qorshaýǵa baryp soqtyǵysqan.
Osy kezde artynan kele jatqan Toyota Estima Changan kóligine soǵylyp, inertsiiamen jol jieginde turǵan taǵy bir tirkemege baryp tirelgen.
Politsiianyń habarlaýynsha, soqqynyń kúshimen Changan markaly kóliktiń qozǵaltqyshy qarsy baǵyttaǵy jolaqqa ushyp baryp, sol sátte kele jatqan Ford Focus kóligine tigen.
Apat saldarynan Changan kóligindegi jolaýshylar oqiǵa ornynda qaza tapty. Al osy kóliktiń júrgizýshisi men Toyota Estima júrgizýshisi túrli jaraqattarymen meditsina mekemesine jetkizildi.
Qazirgi ýaqytta jol-kólik oqiǵasynyń mán-jaiy anyqtalyp jatyr. Qylmystyq is qozǵalǵan.
