Almaty oblysynyń Talǵar aýdanynda politseiler birneshe aýylda úi tonaǵan kúdiktini ustady, - dep habarlaidy "Ult aqparat".
Almaty oblystyq Politsiia departamenti baspasóz qyzmetiniń málimetinshe, Talǵar aýdany Keńdala, Aqtas, Besaǵash jáne Avat aýyldarynyń aýmaǵynda osy jyldyń tamyz – qyrkúiek ailarynda jeke menshik úilerde 9 urlyq deregi tirkelgen. Taǵy ekeýi aqpan jáne maýsym ailarynda jasalǵan. Qylmys jasaý tásili men urlanǵan qundylyqtarǵa sáikes, tártip saqshylary olardy bir adam jasaǵan degen qorytyndyǵa keldi.
«Negizinen, jeńil aqshany jaqsy kóretin azamattyń úige enýdegi ádisi- tereze arqyly bolǵan. Alaida kei jaǵdailarda ol ashyq esikter arqyly da úilerge kirgen. Ol barlyq qundy zattardy, aqsha, altyn buiymdar, teledidarlar, spirttik ónimder, tamaq ónimderin jáne telefondardy qoldy qylǵan. Urlanǵan buiymdardyń qatarynda dánekerleý apparaty da bar»,-deidi Talǵar APB bastyǵynyń orynbasary politsiia polkovnigi Andrei Býrianskii.
Tártip saqshylary Eńbekshiqazaq aýdanynyń 41 jastaǵy, buryn birneshe ret sottalǵan, esh jerde jumys istemeitin turǵynynyń izine tústi. Nátijesinde kúdikti ustalyp, ol óz kinásin tolyq moiyndady. Urlanǵan zattardyń bir bóligi zańdy ielerine qaitaryldy. Keibir qundy buiymdar tabylmady. Biraq olardy satyp alǵan kýágerlerdiń aiǵaqtary bar. Ainalasyndaǵy aýyldardyń turǵyndaryna tynyshtyq bermegen uryny quryqtaǵan úshin jábirlenýshiler politseilerge shyn júrekten alǵystaryn bildirdi. Kúdikti ustalǵannan keiin urlyq sany kúrt azaiǵan.
«Jeke basyn, sottylyǵynyń bolýyn, jasalǵan qylmystardyń sanyn, keltirilgen zalaldyń ótelmeýin eskere otyryp, kúdiktige sotqa deiingi tergep-tekserý kezeńinde kúzetpen ustaý túrindegi bultartpaý sharasy tańdaldy. Onyń basqa da osyǵan uqsas ashylmaǵan qylmystarǵa qatystylyǵyn tekserý boiynsha jumystar jalǵasýda», - dep tolyqtyrdy politsiia polkovnigi Andrei Býrianskii.
