Almaty oblysynda 166 adam jemqorlyq úshin jaýapkershilikke tartyldy, dep habarlaidy QazAqparat.
Almaty oblysynyń sybailas jemqorlyqqa qarsy departamenti ótken jyly boiynsha 166 adamdy qylmystyq jaýapkershilikke tartyp, 102-si sottaldy.
Bul málimetti departament basshysynyń orynbasary Facebook jelisinde ótken AntikorLIVE jobasynyń tikelei efirinde aitty.
Vedomstvo basshysynyń orynbasary 2021 jyldy qorytyndylai otyryp, preventsiia jáne jedel-tergeý baǵyty boiynsha jumys nátijesin jetkizdi.
«Departament 2021 jyldyń 12 aiynda 101 qylmysty tirkedi, onyń ishinde 75 qylmys - sybailas jemqorlyq. Sybailas jemqorlyq qylmysyn jasaǵany úshin 166 adam qylmystyq jaýapkershilikke tartyldy. Onyń ishinde 23 adam - ártúrli dárejedegi birinshi basshylar. 102 adam sottaldy, onyń ishinde 87 adamǵa 250,4 mln teńgeden astam somaǵa aiyppul salyndy. Bas bostandyǵynan 8 adam aiyryldy. Taǵy 8 adamnyń múlki tárkilenip, memlekettik qyzmette jumys atqarý quqyǵynan ómir boiyna aiyryldy», - dedi Jandos Jumabaev.
Departament basshysynyń aqparatyna sáikes, departament memlekettik satyp alý monitoringin júrgizý barysynda oblys biýdjetin tiimsiz qoldanbaq bolǵan mekemelerdi anyqtap, 11 mlrd teńgege jýyq qarajatty únemdep qalǵan.
Oblysta 425 memlekettik jáne kvazimemlekettik uiymda sybailas jemqorlyqqa qarsy komplaens laýazymdary engizilgen.
«Biyl departament mamandary jemqorlyq táýekelderi bar memlekettik mekemelerge 8 ishki taldaý sharasyn júrgizdi. Nátijesinde 143 derek tirkelip, jemqorlyq táýekelderin joiý boiynsha 100%, iaǵni, 143 usynym oryndaldy», - dedi vedomstvo basshysynyń orynbasary.
Aita ketý kerek, ótken jylǵy aiaqtalǵan qylmystyq ister boiynsha jalpy zalal 3,9 mlrd teńgeni qurady, onyń 3,8 mlrd teńgesi óteldi.
