Áleýmettik mańyzy bar azyq-túlik taýarlarynyń baǵasyn turaqtandyrý maqsatynda Almaty oblysynyń turaqtandyrý qoryna kásipkerlik sýbektilerine, saýda kásiporyndaryna (dúkenderge), sondai-aq óńirdiń taýaróndirýshilerine jeńildetilgen zaemdar berý úshin 2 mlrd teńge kóleminde aqshalai qarajat bólinedi, dep habarlaidy "Ult aqparat".
Kásipkerlerge zaemdy 2020 jyldyń ishinde berý josparlanyp otyr.
Almaty oblysy ákiminiń baspasóz qyzmetiniń aqparatyna sáikes, «Jetisý» áleýmettik kásipkerlik korporatsiiasy mamandandyrylǵan uiym retinde áleýmettik mańyzy bar azyq-túlik taýarlaryna baǵany turaqtandyrý tetigin iske asyratyn bolady.
Áleýmettik mańyzy bar azyq-túlik taýarlarynyń 19 ataýynan 17 túri nemese 90% Almaty oblysynyń aýmaǵynda óndiriledi. Taýarlardy satý oblysy ákimdiginiń qaýlysymen bekitilgen bólshek saýda baǵalarynyń shekti máninen tómen baǵalar nemese baǵa deńgeiinde júrgiziledi.
Jeńildetilgen zaemdar Almaty oblysynyń azyq-túlik taýarlarynyń turaqtandyrý qoryn basqarý jónindegi komissiianyń sheshimimen beriledi. Komissiia jergilikti atqarýshy organdar usynǵan kásipkerlik sýbektileri men saýda kásiporyndarynyń ótinimderin qaraityn bolady. Atalmysh nesiege kásipkerlik sýbektileri, saýda kásiporyndary áleýmettik mańyzy bar azyq-túlik taýarlardy belgilengen baǵa boiynsha satýdy júzege asyra bastaidy.
Bul rette kásipkerlik sýbektileriniń menshiginde nemese jalǵa alý quqyǵynda saýda pavilondary, tamaq ónimderin saqtaýǵa arnalǵan qoima infraqurylymy, bank kepildigi bolýy kerek jáne Komissiianyń basqa da talaptaryna sáikes kelýi tiis.
Almaty oblysynyń taýar óndirýshileri úshin jeńildetilgen qarjylandyrý áleýmettik mańyzy bar taýarlar baǵasyn ustap turý jáne óndirý úshin beriletin bolady. Bul sharalar forvardtyq kelisim sharttar túri boiynsha júrgiziledi.
