Almaty oblysynda 30 jastaǵy jigittiń kózine pyshaq suǵyp alǵan kúdikti ustaldy, dep habarlaidy "Ult aqparat".
Bul týraly Almaty oblystyq politsiia departamenti baspasóz qyzmeti málim etti.
21 maýsym kúni saǵat 19:03 shamasynda Almaty oblysy Qarasai aýdandyq politsiia basqarmasynyń kezekshi bólimine Qarasai aýdanynyń Abai aýylynan Almaty qalasynyń №7 qalalyq klinikalyq aýrýhanasyna 30 jastaǵy turǵyn túskeni habarlanǵan. Jábirlenýshiniń sol jaq kózinen pyshaqpen jaralaǵan. Biraq ol aýrýhanaǵa jetkizý kezinde kóz jumǵan.
«Oqiǵa ornyna jetken jedel-tergeý toby qurylysshylardyń Abai kentinde 44 jastaǵy turǵynnyń úiinde jóndeý júrgizgenin anyqtady. Qojaiynǵa túski úziliste jábirlenýshiniń tanysy kelip, ózimen birge 3 bótelke araq alyp kelgen. Spirttik ishimdik ishken jábirlenýshi men bir jumysshynyń arasynda janjal týyndaǵan. Kikiljiń kezinde tabys tabý úshin kelgen Shymkent qalasynyń 22 jastaǵy turǵyny asúi pyshaǵymen jábirlenýshiniń kózinen urǵan. Ol birden dalaǵa shyǵyp, qojaiynnyń avtokóligin aidap áketip, izin sýytqan. QR QK 99-baby 1-bólimi, 200-baby 1-bólimine sáikes sotqa deiingi tergeý júrip jatyr», - dedi Almaty oblysy politsiia departamentiniń resmi ókili, politsiia maiory Aqbota Qýanyshbekqyzy.
«Tosqaýyl» jospary jariialandy. Ratsiia boiynsha habar alǵan «Bort 200» patrýldik politsiia rotasynyń ekipaj quramyndaǵy politsiia leitenanty M. Batakbaev pen politsiia aǵa leitenanty A. Amangeldi «Almaty-Bishkek» avtojolynan izdestirilip jatqan avtokólikti kórip, onyń izine túsken.
Júrgizýshi politsiia qyzmetkerleriniń kólikti toqtatý týraly talabyn esh elemegen. Kóp uzamai kómekke «Bort 190» jáne «Bort 24» patrýl ekipajdary jetken. Politseiler qorshap alǵan soń kúdikti jóndeý júrgizilip jatqan avtojoldyń 36-shaqyrymynda kólikti basqara almai, aýdarylǵannan keiin ustaldy.
«Kúdikti buryn da buzaqylyq jasaǵany úshin qylmystyq jaýapkershilikke tartylǵan. Qazir ol qamaqqa alyndy. Qylmyskerdi ustaýǵa nebári 30 minýt ýaqyt qajet boldy», - dep atap ótti maior Aqbota Qýanyshbekqyzy.
