Almaty oblysynda aǵaly-qaryndas esirtki óndirisimen ainalysyp kelgen, dep habarlaidy QazAqparat Polisia.kz saityna silteme jasap.
«Almaty oblysy Politsiia departamentiniń esirtki qylmysyna qarsy is-qimyl jónindegi qyzmetkerleri Talǵar aýdanynda esirtkiniń jasyryn óndirisin joidy. Kúdiktiler – týystyq qatynastaǵy jigit pen qyz sintetikalyq esirtkini óndirý jáne ótkizý faktilerin anyqtaý boiynsha júrgizilgen «Refleks» arnaiy operatsiiasy barysynda politsiianyń nazaryna ilikti.
Jedel qyzmetkerler barlyq mán-jaidy anyqtaý jáne kúdiktilerdiń esirtkini óndirý men taratýǵa qatystylyǵyn dáleldeý úshin olardy baqylap júrgen.
Qylmystyq áreket rastalyp, esirtki men shikizatty qylmystyq maqsatta paidalaný nemese olardy joiyp jiberý qaýpi týyndaǵan kezde qylmyskerler ustaldy», - delingen habarlamada.
Málim etilgendei, tintý barysynda 3,6 keli alfa-PVP sintetikalyq esirtkisi (7200-den astam birrettik doza), prekýrsorlar, respiratorlar jáne sintetikalyq esirtki zattaryn daiyndaýǵa qajetti qurylǵylar alyndy.
«Ustalǵandardyń jaýabynan belgili bolǵandai, esirtki óndirýmen ainalysý ideiasy birneshe ai buryn paida bolǵan. Aldymen olar Almaty qalasynda esirtkini belgili bir jerge jasyrýmen ainalysyp kelgen, keiin olardy óndirýge kóshken.
Talǵar aýdany Tereńqara kentinde úi jaldap, qajetti himikattar men jabdyqtardy satyp alǵannan keiin esirtki óndirisin bastaǵan. Ony ótkizý úshin kóterme saýdagerlerdi izdestirgen. Daiyn esirtkini kenttiń mańynda adam júrmeitin jerlerge Qulja jolynyń boiynda jasyryp otyrǵan. Kúdiktiler esirtki jasyryp jatqan jerlerinde ustaldy», - delingen politsiia aqparatynda.
Kúdiktiler ýaqytsha ustaý abaqtysyna qamaldy, olar óz kinásin tolyq moiyndady. QR QK-niń 297-baby 3-bóligi 1,3-tarmaqtary (Adamdar tobynyń aldyn ala sóz bailasýy boiynsha jasalǵan asa iri mólsherdegi esirtki zattaryn zańsyz satyp alý, saqtaý, tasymaldaý ne ótkizý) boiynsha sotqa deiingi óndiris qozǵaldy. Bul bap boiynsha 10 jyldan 15 jylǵa deiin bas bostandyǵynan aiyrý jazasy kózdelgen.
