Almaty oblysynda 80 jylqy urlaǵan barymtashy qolǵa tústi, dep habarlaidy "Ult aqparat".
Almaty oblystyq Politsiia departamenti baspasóz qyzmetiniń málimetinshe, bir apta buryn Jambyl aýdanynyń politsiiasyna 38 jastaǵy jergilikti turǵyn aryzdanyp, ózine tiesili sharýa qojalyǵynan 80 jylqynyń qoldy bolǵanyn jáne 40 million teńgege jýyq materialdyq shyǵyn kelgenin aitqan.
Qylmysty ashýǵa baǵyttalǵan jedel-izdestirý sharalary barysynda kúdikke ilingen eki adam ustaldy. Onyń biri – 29 jastaǵy Ózbekstan azamaty. Ol zardap shegýshiniń sharýa qojalyǵynda malshy bolyp jumys istegen. Ekinshi kúdikti Jambyl aýdany Kókdala aýylynyń 39 jastaǵy turǵyny, kórshisiniń adal malyna aramdyq jasap, qol salǵan jaqyn mańdaǵy ózge sharýa qojalyǵynyń iesi bolyp shyqqan.
Kúdiktiler bultartpas aiǵaqtardyń arqasynda osy qylmysqa qatysy baryn moiyndady. Tártip saqshylary qoldy bolǵan maldy izdestirý barysynda 36 jylqyny taýyp, iesine qaitardy. Qalǵan jylqynyń soiylyp ketkeni anyqtaldy. Tergeý barysynda kúdiktiler sharýa qojalyǵynan jylqylardy uzaq ýaqyt boiy urlap kelgeni jáne mal iesiniń politsiiaǵa aryzdanbaǵanyn ońtaily paidalanǵany belgili boldy.
Barymtashylar áýel basta 2-3, keide 5 jylqyny urlaǵan. Olar jalpy sany 80 jylqy satsa, onyń 35-i qulyndy bie bolǵan. Ońai jolmen tabylǵan qarjyny óz qajetterine jaratyp otyrǵan.
Eki kúdikti Jambyl aýdany politsiiasynyń ýaqytsha ustaý izoliatoryna qamaqqa alyndy. Atalǵan derek boiynsha qoldanystaǵy qylmystyq zańnamanyń 188-1-baby 4-bóliginiń 2-tarmaǵyna sáikes sotqa deiingi tergeý amaldary júrgizilip jatyr.
