Almaty oblysynyń Aqsý aýdanyndaǵy Jansúgirov aýylynda 1 mamyr - Qazaqstan halqynyń birligi merekesinde kópbalaly otbasyǵa jańa baspana berildi, dep habarlaidy QazAqparat tilshisi.
Jansúgirov aýylynyń ońtústik-shyǵysynda «Nurly jer» baǵdarlamasy aiasynda salynǵan 20 turǵyn úi boi kótergen. Basqan aýylynyń týmasy, 7 balanyń anasy Samal Qojahmetova jańa úidiń iesi atandy.
«Aýdanymyzda kópbalaly analar az emes. Solardyń biri - jeti balanyń anasyna úidiń kiltin tabystap otyrmyn. Mundai jumystar ári qarai jalǵasyn taýyp, qazaqtyń árbir batyr anasynyń kóńili toq bolýyna yqpal etip, igi bastamamyzdy jalǵastyra beremiz», - dedi aýdan ákimi Esim Seiilhanuly.
Qýanyshyna qoinyna syimaǵan Samal Tursynbekqyzy aýdan ákimdigine sheksiz alǵysyn jetkizdi.
«Búginge deiin baspana qiynshylyǵyn kóp kórdim. Páter jaldap kún keshtik. Baspana bolmaǵandyqtan balalarymdy internatta oqyttym. Endi ózimizdiń jeke úiimiz bar. Aýdan ákimine, jalpy jurtshylyqqa rahmet. Kópbalaly ana dep eskerip, osyndai úidiń kiltin tabys etip otyr», - dedi batyr ana.
Baspananyń aýmaǵy - 68,43 sharshy metr. 3 bólmeli jańa úide «Altyn alqa» iegeri endi Madiiar, Daniiar, Diana, Beibit, Áliia, Aqbota jáne Janarys atty ul-qyzarymen birge turady.
Jalpy, aýdanda qazir 58 kópbalaly jáne áleýmettik jaǵdaiy tómen otbasy úi kezegine tirkelgen. Onyń ishinde úsheýi - «Altyn alqa», 12-si - «Kúmis alqa» iegerleri.
