Foto: freepik
Almaty oblysynda oqý jylynyń aiaqtalǵanyn kútpei mektepte syrlaý jumysy júrip, oqýshylarǵa kesiri tidi. Boiaýdyń iisine 5 bala ýlanyp, 2 jetkinshek aýrýhanaǵa tústi, dep habarlaidy «Ult aqparat» Almaty arnasyna silteme jasap.
Oqiǵa Talǵar aýdanyna qarasty Jalqamys aýylynda bolǵan. Anyqtalǵandai, bilim ordasynda taban asty eden syrlap, qabyrǵa boiaýdy aýysyp kelgenine 1 aptadai ǵana bolǵan direktor tapsyrǵan.
"Juma kúni jumys aiaqtalǵannan keiin, balalar taraǵan soń, jýyp-tazalap, aqtap, boiadyq. Sol kúni aýa raiy azdap salqyn boldy. Bizdiń esebimizshe, kún ystyq bolsa tez keýip keter edi. Kún salqyn bolǵan soń, boiaý jyldam keppedi", - dedi Jalqamys aýyly №15 jalpy bilim beretin orta mekteptiń direktory Gúlnaz Áliǵojaeva.
Mektep qyzmetkerleriniń aitýynsha, sol kúni 2 kabinet qana syrlanǵan. Biri - qabyldaý bólmesi, al ekinshisi - oqýshylar synyby. Direktor óz josparyn aýdandyq bilim bólimine de, sonda oqityn balalardyń ata-analaryna da habarlamapty. Boiaý sińbei jatyp kabinette sabaq ta ótkizilgen.
"Jalǵamys dárigerlik ambýlatoriiasyna №15 orta mektepte oqityn 5 oqýshy júrek ainýy, bas aýrýy jáne bas ainalýy týraly shaǵymdarmen tústi. Diagnoz: boiaý iisinen ýlaný", - deidi Almaty oblystyq densaýlyq saqtaý basqarmasy baspasóz qyzmetiniń jetekshisi Láilim Áýbákirova.
Iistengen 5 bala da úiine jiberildi. Shý shyqqan bilim ordasynda sabaqtar ótip jatyr. Mektep direktorynyń isine qatysty tekseris toby quryldy.
Ishki tekseris júrgizýge kelgen mamannyń aitýynsha, jospardan tys syrlaý-ákteý jumystaryna qarjy qaidan tabylǵany da anyqtalady. Al direktor josparynyń demeýshilerdiń kómegimen iske asqanyn aityp otyr. Málim bolǵandai, Jalqamystaǵy jalǵyz mektepte oryn da tapshy. 300 balaǵa arnalǵan bilim mekemesinde 900-ge jýyq oqýshy dáris alady.
