Almaty oblysynda barymtashy 31 jylqyny aidap áketip bara jatqan jerinen ustaldy. 25 jastaǵy kúdikti buǵan deiin de mal urlap sottalǵan bolyp shyqty, dep habarlaidy QazAqparat.
«19 tamyz kúni politseiler barymtashyny Kóksý ózeninen ótetin aspaly kópir mańynda 31 jylqyny ótkizip jatqan kezde qolǵa túsirgen. Eń qyzyǵy, tártip saqshylary kúdiktini maldyń iesi aryzdanbai jatyp qolǵa túsirgen. Talǵar aýdanynyń turǵyny Kerbulaq aýdanyndaǵy jaiylym jerinen 34 jylqym urlandy dep jergilikti politsiia bólimine 20 tamyzda aryzdanyp kelgen. Alaida dál sol sátte onyń maly qaýipsiz jerde turǵanyn bir-aq bilgen», - dedi Almaty oblystyq Politsiia departamentiniń baspasóz qyzmetinen.
Qýanyshy qoinyna syimaǵan mal iesi oblystyq politsiia departamentine jedel áreketi úshin alǵys bildirdi.
Al maldy urlaǵan kúdikti tergeý barysynda alǵashqy túsiniktemesin bere bastady. Onyń aitýynsha, Sarybulaq aýylynyń ekinshi fermasynyń mańynda iesiz jaiylyp júrgen bir úiir jylqyny baiqap qalǵan. 34 basty ol úsh táýlik boiy óziniń turǵylyqty jeri Kóksý aýylyna qarai aidaǵan. Jol-jónekei 3 jylqy úiirden qalyp qalǵan, deidi kúdikti. Qazirgi tańda kúdikti qamaýǵa alynyp QR QK 188 baby, 4-shi bóligi, 3-shi tarmaǵy boiynsha sot aldy tergeý jumystary jalǵasýda.
