Almaty oblysynda agroónerkásiptik keshendi qoldaýǵa arnalǵan memlekettik sýbsidiialardy zańsyz alý jáne jalǵan shot-faktýralar jazyp berý derekteri boiynsha sot úkimi shyqty, dep habarlaidy ult.kz.
Qylmystyq isti Qarjylyq monitoring agenttiginiń Almaty oblysy boiynsha departamenti tergegen.
Tergeý málimetinshe, «Baǵdaýlet i PK» jáne «Amantaý-2023» aýyl sharýashylyǵy óndiristik kooperativteriniń basshysy eki jyl boiy memlekettik baǵdarlamalar aiasynda sýbsidiialardy zańsyz alyp kelgen.
Ol aýyl sharýashylyǵy basqarmasyna shiki sút satyp alý, sondai-aq sary mai men qatty irimshik óndirý jáne ótkizý jóninde jalǵan málimetter usynǵan. Osy qujattardyń negizinde biýdjetten 251 million teńgeden astam sýbsidiia zańsyz tólengen.
Alaida tergeý barysynda atalǵan kooperativterde kórsetilgen qyzmet túrlerin júzege asyrýǵa qajetti óndiristik qýattardyń, jabdyqtardyń, jumys kúshiniń jáne basqa da resýrstardyń bolmaǵany anyqtalǵan.
Sonymen qatar quqyq qorǵaý organdary «ComputerService» jeke kásipkerligi arqyly jalǵan elektrondyq shot-faktýralar jazyp berý shemasyn áshkerelegen. Tergeý derekterine sáikes, bul tásil jalǵan mámilelerdi rásimdeý jáne kontragentterdiń salyqtyq júktemesin jasandy túrde tómendetý úshin paidalanylǵan.
Saldarynan biýdjetke tólenbei qalǵan salyq kólemi 416 million teńgeden asqan.
Sot qylmystyq shemaǵa qatysy bar eki adamdy kináli dep tanyp, olardy 6 jylǵa deiin bas bostandyǵynan aiyrý jazasyna kesti.
Sondai-aq qylmystyq jolmen alynǵan qarajatqa satyp alynǵan BMW avtokóligi memleket kirisine tárkilendi.
Aita keteiik, sot úkimi ázirge zańdy kúshine engen joq.
