Almaty oblysynda kásipkerlerdiń quqyqtaryn buzǵany úshin 15 laýazymdy tulǵa tártiptik jaýapkershilikke tartyldy, - dep habarlaidy QazAqparat. Bul týraly oblystyq Kásipkerler palatasy direktorynyń quqyqtyq máseleler jónindegi orynbasary — kásipkerlerdiń quqyqtaryn qorǵaý jónindegi mobildi toptyń múshesi Qanat Qabdiev málimdedi.
Onyń aitýynsha, jyl basynan beri quramynda «Atameken» men prokýratýra organdarynyń ókilderi bar biznestiń quqyqtaryn qorǵaý jónindegi mobildi topqa kásip ielerinen 65 ótinish kelip túsken. Atalmysh faktiler boiynsha zańdylyqty buzýshylyqty joiý týraly 26 usynys, alty narazylyq engizildi, sondai-aq jedel-izdestirý is-sharalarynyń júiesi iske asyryldy.
Qanat Qabdiev 4 qyrkúiekten bastap «Prokýratýra týraly» Zańǵa túzetýler kúshine engenin eske saldy. Jańa ózgeristerge sáikes prokýrorlarǵa kásipkerlerdiń memlekettik organdar tarapynan aralasý faktileri boiynsha ótinishterin qaraý quzyreti berildi. Al buryn mundai ótinishter ýákiletti organdarǵa jiberiletin. Endi prokýrorlar biznes sýbektileriniń shaǵymdaryna jedel áreket etip, olar boiynsha tekserýler júrgize alady, qajetti aqparatty ózderi belgilegen merzimde surata alady jáne túsinikteme alý úshin adamdardy shaqyra alady. Budan basqa, prokýrorlar shottardy negizsiz tyiym salý, múlikti paidalanýǵa tyiym salý, qyzmetin toqtata turý, jumystaǵy ýaqytsha jáne ózge de shekteýler siiaqty zańsyz salynǵan shekteý jáne tyiym salý sipatyndaǵy sharalardyń kúshin dereý joia alady.
Mundai faktiler anyqtalǵan kezde prokýror olardyń kúshin joiý týraly qaýly shyǵarady, ol oryndaý úshin mindetti bolady. Qaýlyny oryndamaǵany úshin bir mezgilde ákimshilik jaýaptylyq engiziledi (ÁQBtK – niń 664-1-baby-30 AEK-ke deiin aiyppul salýǵa ákep soǵady).
«Almaty oblysynyń Kásipkerler palatasy men prokýratýrasynyń birlesken jumysy barysynda 10 zańsyz aktiniń kúshi joiyldy, 155 zańsyz tekserý jáne baqylaýdyń ózge de nysandary anyqtaldy, sondai-aq 24 zańsyz tekserý joiyldy. Kásipkerlerdiń quqyqtaryn buzý faktileri boiynsha 15 laýazymdy tulǵa tártiptik jaýapkershilikke tartyldy, 20 biznes sýbektisin ákimshilik jaýapkershilikke zańsyz tartýǵa jol berilmedi jáne jalpy sosmasy 125 000 teńge bolatyn 125 ákimshilik qaýly joiyldy. Jalpy, óńirdiń 8 myńnan astam kásipkerlik sýbektileriniń quqyqtary qorǵaldy», - dep atap ótti «Atameken» ÓKP direktorynyń orynbasary Qanat Qabdiev.
Oblys prokýratýrasy júrgizgen jedel is-sharalar nátijesinde Tekserý komissiiasynyń qyzmetkerleri 90 kásipkerden 17 mln teńge kóleminde para alǵan kezinde ustaldy. Sot úkimimen laýazymdy tulǵalar kináli dep tanyldy. Sondai-aq, 717 jekemenshik balabaqshanyń jan basyna shaqqandaǵy qarjylandyrý mólsheri sáikestendirildi. Mobildik toptyń kúshimen memlekettik satyp alýdyń 23 qatysýshysyna tapsyrys berýshiler zańsyz qaitarmaǵan kepildik jarnalar qaitaryldy.
Sonymen birge, sanitarlyq dárigerlerdiń qaýlylary alynyp tastalyp, qaita qaraldy. Osyǵan deiin kásipkerler qaýly aiasynda zańsyz shekteýlerge jol berilgendigi týraly shaǵymdanǵan bolatyn.
«Kásipkerler júginip, aýdandar men qalalardyń sanitarlyq dárigerleriniń qaýlylaryn talqylaǵannan keiin mobildi top sanitarlyq dárigerlerdiń biznes quqyǵyn buzatyn tórt karantindik buiryǵyn joiyp, ózgertti. Sonymen qatar, biz 20 shaǵyn kásipkerlik sýbektisiniń quqyqtaryn qorǵadyq, olardy politsiia qyzmetkerleri karantindik shekteýlerdiń saqtalýyn zańsyz teksergeni anyqtaldy», - dedi Almaty oblysy prokýrorynyń orynbasary Marat Ábdirahmanov.
Alakól aýdanynyń bilim berý uiymdarynda ashanalar men býfetterdi jalǵa alatyn kásipkerlerdiń ujymdyq ótinishi de biznes paidasyna sheshildi. Belgili bolǵandai, Ulttyq ekonomika ministriniń pandemiia kezinde memlekettik jyljymaityn múlik obektisiniń jaldaý aqysyn eseptemeý týraly buiryǵyna qaramastan, jergilikti atqarýshy organdar 21 kásipkerden tólem aldy. Aýdan prokýratýrasynyń usynysy boiynsha artyq tólengen qarajat somasy qosymsha kelisimmen 2021 jylǵa esepteldi.
Biznestiń júieli problemalyq máseleleri kásipkerlik ókilderi men ýákiletti memlekettik organdardyń qatysýymen «Atameken» ÓKP janyndaǵy Kásipkerlerdiń quqyqtaryn qorǵaý jáne sybailas jemqorlyqqa qarsy is-qimyl jónindegi keńes alańynda belsendi qaralyp, sheshilýde.
«Atamekenmen» birlesken jumystyń nátijesinde búgingi tańda biznestiń úsh problemalyq máselesi júieli máseleler tizilimnen alynyp tastaldy. Qazirgi ýaqytta eki óńirlik jáne bir respýblikalyq problemalyq másele bar. Mysaly, infektsiialyq jáne provizorlyq statsionarlardyń jumysyna tartylǵan meditsina qyzmetkerlerin tasymaldaý, turý jáne ornalastyrý boiynsha kórsetilgen qyzmetter úshin kásipkerlik sýbektilerine tólem jasaý problemalary týraly júieli máseleni Keńes otyrysyna shyǵaryp, qarastyryldy. Onda densaýlyq saqtaý mekemeleriniń biznes sýbektileri aldyndaǵy bereshegin óteý tetigi pysyqtaldy. Prokýrorlyq qadaǵalaý aktisi boiynsha biznes sýbektilerine tiisti qarajat tolyq kólemde tólendi, kináli adamdarǵa qatysty jaýapkershilik týraly másele tártiptik komissiialarda qaralady», - dep atap ótti Marat Ábdirahmanov.
Esterińizge sala keteiik, Almaty oblysynda Kásipkerlerdiń quqyqtaryn qorǵaý boiynsha mobildi top jumys isteidi. Mobildi toptyń mindeti - kásipkerlik sýbektileriniń quqyqtaryn buzý jáne zańdy kásipkerlik qyzmetke kedergi jasaý týraly signaldaryna jedel áreket etý. Senim telefondary+7 7282 24 06 31, +7 778 169 77 79, +7 777 246 6642.
