Táýelsiz Qazaqstanda 140-dan astam ult ókilderi bir shańyraq astynda tatý-tátti ómir súrip kele jatqany belgili. Al bir ǵana Almaty oblysynyń ózinde 105 etnos ózara yntymaǵy jarasyp, berekeli ómir súrýde. Osy oraida «Ult» aqparattyq portaly atalǵan oblystaǵy etnos ókiolderiniń búgingi tynys-tirshiligimen tanystyrýdy jón kórip otyr.
Almaty oblysynda ár etnostyń etnomádeni ortalyqtary óńirlerde turaqty túrde jumys istep keledi. Búgingi tańda «Dostyq úiinde» oblystyq jáne qalalyq 23 etnomádeni birlestigi jumyla qyzmet atqarady.
Máselen, «Almaty oblystyq slavian qozǵalysynyń» tóraiymy – Natalia Belik. Bul qozǵalystyń belsendileri maqsatty túrde balalar men jasóspirimder demalysyn uiymdastyryp, oblysta ár túrli baǵyttaǵy kásibi jáne áýesqoi shyǵarmashylyq ujymdar qurady.
«Óńirimizde halyqaralyq – «Pýshkin jazy» balalar festivaliniń birneshe ret ótkizilýi – slavian qozǵalysynyń maqtanyshy. Ortalyq Aziianyń bes elinen myńnan astam jasóspirim qatysqan festivaldiń maqsaty – balalar men jastar úshin etnomádeni keńistikti saqtaý, óskeleń urpaqqa halyqtar dostyǵy men patriottyq turǵyda tárbie berý. Buǵan qosa, halyqtyq shyǵarmashylyqqa, slaviandardyń mádeni murasyna baýli otyryp, óskeleń urpaqtyń shyǵarmashylyq darynyn damytýdy kózdeidi», - deidi «Almaty oblystyq slavian qozǵalysynyń» tóraiymy – Natalia Belik.
Sonymen qatar, Táýelsizdigimizdiń alǵashqy jyldarynda-aq «Almaty oblystyq orys ortalyǵy» qoǵamdyq birlestigi ashylǵan. Onyń qazirgi tóraǵasy Aleksandr Býzykin. Qazaqstandaǵy ulttar dostyǵy týraly orys diasporasynyń ókidi Anna Merzliakova áńgimelep berdi.
«Qazaqstandaǵy ulttar dostyǵyn kózben kórip, júrekpen sezip júrgenderdiń biri menmin. Kóńili daladai darqan qazaq halqy barlyq ult ókilderin óziniń jaqynyndai kóredi. Bir úidiń balasyndai bir shańyraq astynda tatý-tátti ómir súrip kelemiz. Men óz ana tilimmen qatar, memlekettik til – qazaq tilin bilemin, qurmetteimin. Til bilý arqyly men qazaqtyń janyn túsindim desem de bolady. Qazaqtai darqan halyqtyń keńdigin, bailyǵyn, kóńilin uqtym. Sol úshin men qazaq halqyna máńgi qaryzdarmyn. Qazaq tili – álemdegi bai tilderdiń biri dese buryn senbes edim. Qazaq tilin úirengeli beri qazaq tiliniń qanshalyqty bai ekenin túsindim», - deidi Anna Merzliakova.
Aita keteiik, táýelsizdik jyldary bul uiym óte belsendi jumys istegen. Atap aitqanda, teatr ónerin damytýǵa jáne jergilikti halyqty slavian mádenietimen tanystyrý aýqymyn keńeitken, qalalyq jáne oblystyq buqaralyq mádeni sharalarǵa belsendi túrde qatysatyn «Sýdarýshka» halyq ansambli qurylǵan, «Harýat» shyǵarmashylyq ortalyǵy ashylǵan. Etnomádeni birlestikterdiń qyzmeti árqaisysynyń jeke úilestirýshisi bar sektorlarǵa bólingen. Bul birlestiktiń barlyq resýrsyn barynsha tiimdi paidalanýǵa múmkindik beredi. Soynmen qatar, «Kapitoshka» qýyrshaq teatry, «Jas fotosýretshi mektebi» uiymdastyrylǵan.
Al «Belorýs mádeniet ortalyǵy» óńirlik qoǵamdyq birlestigin Janna Tretiak basqarady.
Tóraiymnyń aitýynsha, atalǵan ortalyq Qazaqstan men Belarýs arasyndaǵy yntymaqtastyqty nyǵaitý, ekonomika men bilim, mádeniet salasy boiynsha qarym-qatynasty kúsheitýdi maqsat etedi.
«Bizdiń birlestik Qazaqstan halqynyń bereke-birligin, etnosaralyq tatýlyǵy men dostyǵyn nyǵaitýǵa barynsha úles qosyp, belorýs etnosynyń mádenietin, salt-dástúri men ádet-ǵurpyn saqtaýǵa belsene atsalysýda. Ortalyq quramynda jastar toby da jumys atqarady. Búgingi kúni belorýs ortalyǵy QHA shyǵarmashylyq toptarynyń - «Slavian bazary» halyqaralyq festivaline qatysýyna múmkindik beretin jańa jobalardy qolǵa alýda. Sonymen birge birlestik jyl saiynǵy dástúrli merekelerdi ótkizýdi de kún tártibinen qaldyrǵan emes. Máselen, Rojdestvo, Maslenitsa jáne Siabrina meiramdarymen qatar, qaiyrymdylyq kórsetýde de birshama isterge uiytqy bolyp otyr», - dedi tóraiym.
Sonymen qatar, Almaty oblysynda Daria Kravchenko basqaratyn «bolgar mádeni ortalyǵy» jumys isteidi. Ortalyq bolgar etnosynyń tili men mádenietin damytýdy, etnosaralyq kelisimdi saqtaý men jastardy toleranttylyq rýhynda tárbieleýdi negizgi mindeti sanaidy.
«Bizdiń ortalyq «Rodnoe slovo» bolgar tili men mádenieti kúnderin, etnikalyq muraǵa qatysy bar basqa da sharalar ótkizip turady. Etnobirlestik músheleri jyl saiyn dástúrlerden basqa halyq tarihymen tanystyrýǵa baǵyttalǵan san alýan is-sharalar uiymdastyryp jatyrmyz. Ortalyq júzege asyrǵan áleýmettik mańyzy bar jobalardyń biri – «Múgedekter bizdiń aramyzda». Onda birlestiktiń belsendi músheleri múgedekterge qamqorlyq jasap, olardyń emdelýine kómek bere alatyn demeýshiler taýyp beredi. Buǵan qosa, joǵary jáne arnaýly orta bilim alý máselelerin sheship, óz biznesin ashýǵa keńes berip otyramyz»,- deidi Daria Kravchenko.
Esterińizge sala keteiik, Táýelsiz Qazaqstanda 140-dan astam ult ókilderi bir shańyraq astynda tatý-tátti ómir súrip kele jatqany belgili. Al bir ǵana Almaty oblysynyń ózinde 105 etnos ózara yntymaǵy jarasyp, berekeli ómir súrýde. Al ár etnostyń etnomádeni ortalyqtary óńirlerde turaqty túrde jumys istep keledi. Búgingi tańda «Dostyq úiinde» oblystyq jáne qalalyq 23 etnomádeni birlestigi jumyla qyzmet atqarady.
